ബെംഗളൂരു: വരാനിരിക്കുന്ന ഉത്സവ സീസണിൽ വിമാനയാത്രക്കാർക്ക് തിരിച്ചടിയായി പ്രമുഖ വിമാനക്കമ്പനിയായ ഇൻഡിഗോ ഇന്ധന ചാർജ് വർധിപ്പിച്ചു. ചൊവ്വാഴ്ച മുതൽ പ്രാബല്യത്തിൽ വന്ന പുതിയ നിരക്ക് വർധന പ്രകാരം ചില റൂട്ടുകളിൽ 44 ശതമാനം വരെയാണ് ചാർജ് കൂട്ടിയത്. ബംഗളൂരുവിൽ നിന്ന് ദിനംപ്രതി എൺപതിലധികം സർവീസുകൾ നടത്തുന്ന ഇൻഡിഗോയുടെ നീക്കം ദീർഘദൂര യാത്രക്കാരെയാണ് കൂടുതൽ ബാധിക്കുക.
വിമാന ഇന്ധനവില വർധന തിരിച്ചടിയായി ഏഴു മാസത്തിനിടെ ഇത് രണ്ടാം തവണയാണ് ഇൻഡിഗോ യാത്രാനിരക്കുകളിൽ മാറ്റം വരുത്തുന്നത്. വിമാന ഇന്ധനമായ എവിഎഷൻ ടർബൈൻ ഫ്യുവലിന്റെ (ATF) വില കുത്തനെ ഉയർന്നതാണ് നിരക്ക് വർധിപ്പിക്കാൻ കാരണമായി കമ്പനി ചൂണ്ടിക്കാണിക്കുന്നത്. ഉത്സവ സീസണിൽ ബംഗളൂരുവിൽ നിന്ന് തിരുവനന്തപുരം, മുംബൈ, ഗോവ തുടങ്ങിയ സ്ഥലങ്ങളിലേക്ക് യാത്ര ചെയ്യുന്ന പ്രവാസികൾക്കും മറ്റ് സംസ്ഥാന തൊഴിലാളികൾക്കും പുതിയ തീരുമാനം വലിയ സാമ്പത്തിക ഭാരമുണ്ടാക്കും.
ദീർഘദൂര യാത്രക്കാർക്ക് വലിയ തുക നൽകേണ്ടിവരും പുതിയ നിരക്ക് പ്രകാരം ബംഗളൂരുവിൽ നിന്ന് മുംബൈയിലേക്കുള്ള (850 കി.മീ) യാത്രയ്ക്ക് ഇന്ധന ചാർജ് 600 രൂപയിൽ നിന്ന് 900 രൂപയായി ഉയർന്നു. 1500 കിലോമീറ്ററിൽ കൂടുതൽ ദൂരമുള്ള ഡൽഹി, കൊൽക്കത്ത, ജയ്പൂർ തുടങ്ങിയ നഗരങ്ങളിലേക്കുള്ള ഇന്ധന ചാർജ് 800 രൂപയിൽ നിന്ന് 1,150 രൂപയാക്കി വർധിപ്പിച്ചു. 2,300 കിലോമീറ്റർ അകലെയുള്ള ശ്രീനഗറിലേക്ക് ഇന്ധന ചാർജിൽ മാത്രം 350 രൂപയുടെ വർധനവാണ് ഉണ്ടായിരിക്കുന്നത്.
ദസറ, ദീപാവലി സീസൺ; ടിക്കറ്റ് നിരക്കുകൾ അഞ്ചക്കത്തിലേക്ക് ദസറ, ദീപാവലി ആഘോഷങ്ങൾ അടുത്തുവരുന്നതോടെ വടക്കൻ, കിഴക്കൻ സംസ്ഥാനങ്ങളിലേക്കുള്ള വിമാനക്കൂലി നിലവിൽ തന്നെ വളരെ ഉയർന്ന നിലയിലാണ്. ബംഗളൂരുവിൽ നിന്ന് കൊൽക്കത്തയിലേക്കുള്ള വിമാന ടിക്കറ്റ് നിരക്കുകൾ നിലവിൽ അഞ്ചക്ക സംഖ്യയിലാണ് രേഖപ്പെടുത്തുന്നത്. ഒരു കുടുംബത്തിന് കൊൽക്കത്തയിലേക്കുള്ള മടക്കയാത്രയ്ക്ക് മാത്രം ഒരു ലക്ഷം രൂപയിലധികം ചെലവ് വരും. ചില യാത്രക്കാർ ചെലവ് കുറയ്ക്കുന്നതിനായി കണക്റ്റിംഗ് സർവീസുകളെയും സ്പ്ലിറ്റ് ജേർണികളെയും ആശ്രയിക്കുന്നുണ്ട്.
ടൂറിസം മേഖലയ്ക്ക് തിരിച്ചടിയാകുമെന്ന് ആശങ്ക ഒക്ടോബർ മുതൽ ദക്ഷിണേന്ത്യയിൽ വിനോദസഞ്ചാര സീസൺ ആരംഭിക്കാനിരിക്കെ, നിരക്ക് വർധനവ് ടൂറിസം, ഹോസ്പിറ്റാലിറ്റി, ഗതാഗത മേഖലകളെ പ്രതികൂലമായി ബാധിക്കുമെന്ന് കർണാടക സ്റ്റേറ്റ് ട്രാവൽ ഓപ്പറേറ്റേഴ്സ് അസോസിയേഷൻ (KSTOA) പ്രത്യാശ പ്രകടിപ്പിച്ചു. ദൂരസ്ഥലങ്ങളിലേക്ക് യാത്ര ചെയ്യുന്നവർക്ക് അവരുടെ യാത്രാ ബജറ്റ് പുനഃപരിശോധിക്കേണ്ട സാഹചര്യമാണ് നിലവിലുള്ളതെന്നും സംഘടന വ്യക്തമാക്കി.
