ബെംഗളൂരു: സർക്കാർ നിശ്ചയിച്ച നിരക്ക് മാനദണ്ഡങ്ങൾ ലംഘിച്ച് യാത്രക്കാരിൽ നിന്ന് അമിത തുക ഈടാക്കുന്നുവെന്ന ആരോപണത്തിൽ പ്രമുഖ റൈഡ് ഹെയ്ലിംഗ് ആപ്പുകളായ ഓല, ഉബർ, റാപ്പിഡോ, നമ്മ യാത്രി എന്നിവർക്ക് കർണാടക ഗതാഗത വകുപ്പ് കാരണം കാണിക്കൽ നോട്ടീസ് അയച്ചു. 2024 ഫെബ്രുവരി 3-ലെ സർക്കാർ വിജ്ഞാപനം ലംഘിച്ച് കമ്പനികൾ യാത്രക്കാരെ ചൂഷണം ചെയ്യുന്നതായി വിവിധ ടാക്സി-ഡ്രൈവർ സംഘടനകൾ നൽകിയ പരാതിയുടെ അടിസ്ഥാനത്തിലാണ് ഈ നടപടി.
സമയാധിഷ്ഠിത നിരക്കിനെതിരെ പ്രതിഷേധം ശക്തം
സർക്കാർ അംഗീകരിച്ച നിരക്കുകൾ പാലിക്കുന്നതിന് പകരം, യാത്രയ്ക്ക് എടുക്കുന്ന സമയവും മറ്റ് ഘടകങ്ങളും മാനദണ്ഡമാക്കി കമ്പനികൾ തോന്നിയതുപോലെ തുക നിശ്ചയിക്കുകയാണെന്ന് മോട്ടോർ വാഹന സംഘടനകൾ ആരോപിച്ചു. ഓഗസ്റ്റ് 4-ന് നടന്ന യോഗത്തിൽ അഗ്രഗേറ്റർ കമ്പനികൾക്കെതിരെ കർശന നടപടി സ്വീകരിക്കണമെന്ന് ഡ്രൈവർമാരുടെ പ്രതിനിധികൾ ഗതാഗത വകുപ്പിനോട് ആവശ്യപ്പെട്ടിരുന്നു. ഓല, ഉബർ തുടങ്ങിയ കമ്പനികൾ നിയമാനുസൃത നിരക്ക് ഘടന അട്ടിമറിക്കുകയാണെന്ന് കെമ്പെഗൗഡ ഇന്റർനാഷണൽ എയർപോർട്ട് ടാക്സി ഓണേഴ്സ് ആൻഡ് ഡ്രൈവേഴ്സ് വെൽഫെയർ അസോസിയേഷനും പരാതിപ്പെട്ടിരുന്നു.
ഡ്രൈവർമാരുടെ വരുമാനത്തിലും വെട്ടിക്കുറവ്
മാർച്ച് 16-ന് കർണാടക ഡ്രൈവേഴ്സ് ഫെഡറേഷൻ സംസ്ഥാന പ്രസിഡന്റ് നാരായണസ്വാമിയും ഇതുസംബന്ധിച്ച് സർക്കാരിന് നിവേദനം നൽകിയിരുന്നു. കമ്പനികളുടെ നിലവിലെ നയം കാരണം സർക്കാർ നിശ്ചയിച്ച നിരക്കിനനുസരിച്ചുള്ള അർഹമായ വരുമാനം ഡ്രൈവർമാർക്ക് ലഭിക്കുന്നില്ലെന്ന് അദ്ദേഹം ചൂണ്ടിക്കാട്ടി. 2016-ലെ കർണാടക ഓൺ-ഡിമാൻഡ് ട്രാൻസ്പോർട്ടേഷൻ ടെക്നോളജി അഗ്രഗേറ്റർ ചട്ടങ്ങളിലെ റൂൾ 9 അനുസരിച്ചുള്ള നിരക്കുകൾ മാത്രമേ ഈടാക്കാവൂ എന്ന് ഗതാഗത വകുപ്പ് കമ്പനികൾക്ക് കർശന നിർദ്ദേശം നൽകിയിട്ടുണ്ട്.
ഏഴ് ദിവസത്തിനകം മറുപടി നൽകണം; ലൈസൻസ് റദ്ദാക്കലിന് സാധ്യത
നോട്ടീസ് കൈപ്പറ്റി ഏഴ് ദിവസത്തിനകം രേഖാമൂലം വിശദീകരണം നൽകണമെന്നാണ് അഗ്രഗേറ്റർ കമ്പനികളോട് ആവശ്യപ്പെട്ടിരിക്കുന്നത്. നിശ്ചിത സമയത്തിനകം മറുപടി നൽകിയില്ലെങ്കിൽ വിഷയം ഗൗരവമായി കാണുകയും 2016-ലെ ചട്ടങ്ങളിലെ റൂൾ 11 പ്രകാരം കമ്പനികളുടെ ലൈസൻസ് സസ്പെൻഡ് ചെയ്യുന്നത് അടക്കമുള്ള തുടർനടപടികളിലേക്ക് കടക്കുമെന്നും ഗതാഗത വകുപ്പ് മുന്നറിയിപ്പ് നൽകി. എന്നാൽ, നോട്ടീസ് നൽകിയതിനുശേഷവും കമ്പനികളുടെ ഭാഗത്തുനിന്ന് ഇതുവരെ പ്രതികരണമൊന്നും ലഭ്യമായിട്ടില്ലെന്ന് ഗതാഗത വകുപ്പ് വൃത്തങ്ങൾ വ്യക്തമാക്കി.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
