ബെംഗളൂരു: ‘വേസ്റ്റ് ഫ്രീ ബെംഗളൂരു’ പ്രചാരണത്തിന്റെ ഭാഗമായി നഗരത്തിലെ നടപ്പാതകളിൽ തടസ്സമായി നിന്ന വൈദ്യുത തൂണുകളും അനുബന്ധ സാമഗ്രികളും നീക്കം ചെയ്ത് ബെസ്‌കോം. ഗ്രേറ്റർ ബെംഗളൂരു അതോറിറ്റിയുമായി (ജിബിഎ) കൈകോർത്താണ് ബെസ്‌കോം ഈ ശുചീകരണ ദൗത്യം ഏറ്റെടുത്തിരിക്കുന്നത്.
വൈദ്യുതി വിതരണത്തോടൊപ്പം പൊതുജനങ്ങളുടെ സുരക്ഷയ്ക്കും ബെസ്‌കോം തുല്യ പ്രാധാന്യമാണ് നൽകുന്നതെന്ന് ഊർജ മന്ത്രി കെ.ജെ. ജോർജ് പറഞ്ഞു. കാൽനടയാത്രക്കാരുടെ സുരക്ഷയ്ക്ക് തടസ്സങ്ങളില്ലാത്ത നടപ്പാതകൾ അനിവാര്യമാണെന്നും ഈ മാസം അവസാനത്തോടെ ജനങ്ങൾക്ക് കൂടുതൽ സുരക്ഷിതമായ നടപ്പാതകളും മാലിന്യമുക്തമായ അന്തരീക്ഷവും ഒരുക്കുമെന്നും അദ്ദേഹം കൂട്ടിച്ചേർത്തു.
ശനിയാഴ്ച ആയിരക്കണക്കിന് ഉദ്യോഗസ്ഥരും ജീവനക്കാരും തെരുവിലിറങ്ങി നഗരത്തിലുടനീളമുള്ള വൈദ്യുതി അടിസ്ഥാന സൗകര്യങ്ങൾ ശുചീകരിച്ചു. ഓഗസ്റ്റ് 1 മുതൽ 8 വരെയുള്ള ദിവസങ്ങളിൽ പ്രചാരണത്തിന്റെ ഭാഗമായി 356 വൈദ്യുത തൂണുകൾ, 10 ട്രാൻസ്‌ഫോർമർ കേന്ദ്രങ്ങൾ, 323 ജിഎസ് ഓപ്പറേറ്റിങ് റോഡുകളുടെ മാറ്റങ്ങൾ ഉൾപ്പെടെ 199 മറ്റ് അടിസ്ഥാന സൗകര്യ ജോലികൾ ബെസ്‌കോം പൂർത്തിയാക്കി.
