ബെംഗളൂരു: സിലിക്കൺ സിറ്റിയുടെ സാംസ്കാരിക വൈവിധ്യവും സർഗ്ഗാത്മകതയും ആഗോളതലത്തിൽ പ്രദർശിപ്പിക്കുക എന്ന ലക്ഷ്യത്തോടെ കെംപഗൗഡ അന്താരാഷ്ട്ര വിമാനത്താവളത്തിൽ (BLR) ‘ബെംഗളൂരുവിൻ്റെ ആത്മ’ (The Soul of Bengaluru) എന്ന ബൃഹത്തായ കലാശില്പം അനാച്ഛാദനം ചെയ്തു. ടെർമിനൽ 2-ന് മുന്നിലായി സ്ഥാപിച്ചിരിക്കുന്ന ഈ മനോഹരമായ കലാസൃഷ്ടി ബയോകോൺ ഫൗണ്ടേഷനും ബെംഗളൂരു ഇന്റർനാഷണൽ എയർപോർട്ട് ലിമിറ്റഡും (BIAL) സംയുക്തമായാണ് ഒരുക്കിയിരിക്കുന്നത്. ലോകപ്രശസ്ത സ്പാനിഷ് കലാകാരനായ ജൗമെ പ്ലെൻസയാണ് ഈ ശില്പം വിഭാവനം ചെയ്തത്.
ഇന്ത്യയിലെ സ്പാനിഷ് അംബാസഡർ ജുവാൻ അന്റോണിയോ മാർച്ച് പുജോൾ ശില്പത്തിൻ്റെ ഔദ്യോഗിക അനാച്ഛാദനം നിർവഹിച്ചു. ചടങ്ങിൽ കർണാടക ഗ്രാമവികസന, ഐടി-ബിടി മന്ത്രി പ്രിയങ്ക് ഖാർഗെ, ബയോകോൺ ഗ്രൂപ്പ് ചെയർപേഴ്സൺ കിരൺ മജുംദാർ-ഷാ, ബിഐഎഎൽ മാനേജിംഗ് ഡയറക്ടറും സിഇഒയുമായ ഹരി മാരാർ, ശില്പി ജൗമെ പ്ലെൻസ എന്നിവർ പങ്കെടുത്തു.
പെയിന്റ് ചെയ്ത സ്റ്റെയിൻലെസ് സ്റ്റീൽ ഉപയോഗിച്ച് നിർമ്മിച്ച ഈ ശില്പത്തിന് 500 x 319 x 375 സെന്റീമീറ്റർ വലിപ്പമുണ്ട്. വൈവിധ്യമാർന്ന സംസ്കാരങ്ങളുടെയും നൂതന ആശയങ്ങളുടെയും സർഗ്ഗാത്മകതയുടെയും സംഗമസ്ഥാനമെന്ന നിലയിൽ ബെംഗളൂരുവിന്റെ സ്വത്വത്തെയാണ് ഇത് പ്രതിനിധീകരിക്കുന്നത്. ചിക്കാഗോ, ലണ്ടൻ, ന്യൂയോർക്ക്, ടോക്കിയോ തുടങ്ങിയ ലോകോത്തര നഗരങ്ങളിൽ ശ്രദ്ധേയമായ കലാസൃഷ്ടികൾ നിർമ്മിച്ച് അന്താരാഷ്ട്ര പ്രശസ്തി നേടിയ കലാകാരനാണ് ജൗമെ പ്ലെൻസ.
ഒരു നഗരത്തിന്റെ വികസനം അടിസ്ഥാന സൗകര്യങ്ങളിൽ മാത്രമല്ല, കലയിലും സംസ്കാരത്തിലുമുള്ള നിക്ഷേപത്തിലൂടെയുമാണ് പൂർണ്ണമാകുന്നത് എന്ന് ബയോകോൺ ഗ്രൂപ്പ് ചെയർപേഴ്സൺ കിരൺ മജുംദാർ-ഷാ പറഞ്ഞു. പൊതുവിടങ്ങളിൽ ഇത്തരം കലാസൃഷ്ടികൾ സ്ഥാപിക്കുന്നത് മാനവികതയുടെ സ്പർശം നൽകുമെന്നും അവർ കൂട്ടിച്ചേർത്തു. വിമാനത്താവളത്തിന്റെ ടെർമിനൽ 2 വെറുമൊരു യാത്രാ കേന്ദ്രമല്ല, മറിച്ച് കലയുടെയും അടിസ്ഥാന സൗകര്യങ്ങളുടെയും അപൂർവ്വ സംഗമം സാധ്യമാകുന്ന ഒരു സാംസ്കാരിക കവാടമാണെന്ന് ഹരി മാരാർ അഭിപ്രായപ്പെട്ടു. വിമാനത്താവളത്തിലൂടെ കടന്നുപോകുന്ന ദശലക്ഷക്കണക്കിന് യാത്രക്കാർക്ക് ഈ ശില്പം ഉദ്യാന നഗരത്തിന്റെ മനോഹരമായ ഓർമ്മയായി മാറുമെന്നും അദ്ദേഹം പറഞ്ഞു.
ബയോകോൺ ഗ്രൂപ്പിന്റെ സിഎസ്ആർ വിഭാഗമായ ബയോകോൺ ഫൗണ്ടേഷൻ തങ്ങളുടെ നഗര വികസന പരിപാടികളുടെ ഭാഗമായാണ് ഈ പദ്ധതിയെ പിന്തുണച്ചത്. കലകളോടുള്ള വിമാനത്താവള അധികൃതരുടെ ഈ പ്രതിബദ്ധത ആഗോളതലത്തിലും അംഗീകരിക്കപ്പെട്ടിട്ടുണ്ട്. സ്കൈട്രാക്സിന്റെ 2026-ലെ ‘ലോകത്തിലെ ഏറ്റവും മികച്ച കലാ വിമാനത്താവളം’ റാങ്കിംഗിൽ എട്ടാം സ്ഥാനത്തുണ്ടായിരുന്ന ബെംഗളൂരു വിമാനത്താവളം ഇത്തവണ അഞ്ചാം സ്ഥാനത്തേക്ക് കുതിച്ചത് ഇതിന് അടിവരയിടുന്നു.
