ഗതാഗതക്കുരുക്ക് അഴിക്കാൻ തടാകങ്ങൾക്ക് മുകളിലൂടെ റോഡുപണിയാൻ വമ്പൻ നീക്കം; ന​ഗരത്തെ കാത്തിരിക്കുന്നത് വലിയ ദുരന്തം?

പച്ചപ്പുനിറഞ്ഞ പ്രദേശങ്ങളിലേക്ക് റോഡുകൾ; കണ്ണുവെച്ച് റിയൽ എസ്റ്റേറ്റ് മേഖല

ഒൻപത് മുതൽ 24 മീറ്റർ വരെ വീതിയിൽ നൂറുകണക്കിന് കിലോമീറ്റർ റോഡുകളാണ് നഗരത്തിലുടനീളം നിർമിക്കാൻ നിർദേശിച്ചിട്ടുള്ളത്. നഗര ഗതാഗതം സുഗമമാക്കുന്നതിനൊപ്പം, ഇതുവരെ വികസനമെത്താത്ത ഭൂപ്രദേശങ്ങളിലേക്ക് വഴിതുറക്കുക എന്ന ലക്ഷ്യവും ഇതിന് പിന്നിലുണ്ട്. നിലവിൽ നോ-ഡെവലപ്‌മെന്റ് സോണുകളിൽ ഉൾപ്പെട്ടിരുന്ന പച്ചപ്പുള്ള പ്രദേശങ്ങളിലേക്ക് റോഡ് കണക്റ്റിവിറ്റി വരുന്നതോടെ, ഇവ വാണിജ്യ-തൊഴിൽ ആവശ്യങ്ങൾക്കായി കൈയേറപ്പെടാനും പ്രദേശങ്ങളുടെ സ്വാഭാവിക അന്തരീക്ഷം നഷ്ടപ്പെടാനും സാധ്യതയേറെയാണ്.

ഈയിടെ ജി.ബി.എയും ബി.ഡി.എയും ബംഗളൂരു മെട്രോപൊളിറ്റൻ റീജിയൻ ഡെവലപ്‌മെന്റ് അതോറിറ്റിയും ചേർന്ന് ഭാവി വികസനത്തിനായുള്ള പുതിയ സർക്കുലേഷൻ നെറ്റ്‌വർക്ക് മാപ്പുകൾ പുറത്തിറക്കിയിരുന്നു. ഇതിന്മേൽ പൊതുജനങ്ങൾക്ക് പരാതികളും എതിർപ്പുകളും അറിയിക്കാൻ 60 ദിവസത്തെ സമയമാണ് അനുവദിച്ചിട്ടുള്ളത്. ഈ കാലാവധി കഴിയുന്നതോടെ, തയാറാക്കിയ മാപ്പുകൾ നിലവിലെ മാസ്റ്റർ പ്ലാനിന്റെ ഭാഗമാക്കി മാറ്റാനാണ് അധികൃതരുടെ തീരുമാനം.

ഭീഷണിയിലായി പ്രധാന തടാകങ്ങളും സ്വാഭാവിക അരുവികളും

ജി.ബി.എ പരിധിയിൽ ഏകദേശം ഇരുനൂറോളം തടാകങ്ങളും 850 കിലോമീറ്ററോളം നീളമുള്ള വലിയ മഴവെള്ളക്കാനകളുമുണ്ട്. പുതിയ നിർദേശങ്ങൾ പരിശോധിക്കുമ്പോൾ, പല പ്രമുഖ തടാകങ്ങളെയും തൊട്ടുരുമ്മിയും അവയുടെ അതിർത്തികൾ കയ്യേറിയുമാണ് റോഡുകളുടെ ഗതി നിർണ്ണയിച്ചിരിക്കുന്നത്. ഈസ്റ്റ് ബംഗളൂരുവിലെ ദൊഡ്ഡനെക്കുന്ദി, നല്ലാരുഹള്ളി തടാകങ്ങൾ, സൗത്ത് ബംഗളൂരുവിലെ ബേഗൂർ, പുട്ടേനഹള്ളി തടാകങ്ങൾ, നോർത്ത് ബംഗളൂരുവിലെ ദൊഡ്ഡബൊമ്മസാന്ദ്ര തടാകം എന്നിവ ഇതിൽ പെടുന്നു. കൂടാതെ ബെല്ലന്തൂർ, പാരപ്പന അഗ്രഹാര, ബസാപുര, ഗാർവേഭാവിപാളയ തുടങ്ങിയ തടാകങ്ങളുടെ ഒന്നിലധികം വശങ്ങളിലൂടെ റോഡുകൾ നിർമിക്കാൻ പദ്ധതിയുണ്ട്.

നൈസ് (NICE) റോഡിലേക്ക് ബന്ധിപ്പിക്കുന്ന നിരവധി റോഡുകളും ഇതിൽ ഉൾപ്പെടുന്നു. മൈലാസാന്ദ്ര, സുബേദാർപാളയ കെരെ, അഞ്ചനാപുര ടൗൺഷിപ്പിലെ കെംബത്തള്ളി, സോമപുര തുടങ്ങിയ പ്രദേശങ്ങളിലാണ് ഇവ പ്രധാനമായും കേന്ദ്രീകരിച്ചിരിക്കുന്നത്. ദൊഡ്ഡകല്ലസാന്ദ്രയിൽ നിന്ന് നൈസ് റോഡിലേക്ക് ഒഴുകുന്ന സ്വാഭാവിക അരുവിയുടെ ഇരുവശങ്ങളിലൂടെയും റോഡുകൾ നിർദ്ദേശിച്ചിട്ടുണ്ട്.

ഭൂമി ഏറ്റെടുക്കൽ കടമ്പ ഒഴിവാക്കാൻ തടാകങ്ങളെ ബലികൊടുക്കുന്നു

സാധാരണയായി മാസ്റ്റർ പ്ലാൻ റോഡുകൾ സ്വകാര്യ ഭൂമിയിലൂടെയാണ് കടന്നുപോകുന്നത്. ഇതിനായി ഭൂവുടമകൾക്ക് നഷ്ടപരിഹാരമോ അധിക നിർമാണാനുമതിയോ നൽകി ഭൂമി ഏറ്റെടുക്കേണ്ടി വരും. എന്നാൽ ഭൂമി ഏറ്റെടുക്കൽ നടപടികളിലെ സങ്കീർണ്ണതകളും നിയമതടസ്സങ്ങളും ഒഴിവാക്കാൻ അധികൃതർ കണ്ടെത്തിയ എളുപ്പവഴിയാണ് തടാകങ്ങളുടെയും കാനകളുടെയും ബഫർ സോണുകളിലൂടെ റോഡുകൾ നിർമിക്കുക എന്നത്.

‘ബംഗളൂരുവിന് കടുത്ത കുടിവെള്ളക്ഷാമമുണ്ടാകും’; പ്രതിഷേധവുമായി നാട്ടുകാരും സംഘടനകളും

ശാസ്ത്രീയമായ യാതൊരു പഠനവുമില്ലാതെയാണ് റോഡുകളുടെ അലൈൻമെന്റുകൾ നിശ്ചയിച്ചിരിക്കുന്നതെന്ന് സൗത്ത് ബംഗളൂരു നിവാസിയായ ലിംഗരാജ് ഡി ആരോപിച്ചു. പുട്ടേനഹള്ളി തടാകത്തിന് നിലവിൽ 30 അടി വീതിയുള്ള ബണ്ട് മാത്രമാണുള്ളതെന്നും അവിടെ 60 അടി വീതിയിൽ റോഡ് നിർമിക്കുമ്പോൾ തടാകത്തിന്റെ വെള്ളം ഉൾക്കൊള്ളാനുള്ള ശേഷി പകുതിയായി കുറയുമെന്നും അദ്ദേഹം ചൂണ്ടിക്കാട്ടി. കുടിവെള്ള ക്ഷാമം രൂക്ഷമായ ബംഗളൂരുവിൽ ഇത്തരം നടപടികൾ വലിയ പ്രത്യാഘാതങ്ങൾ ഉണ്ടാക്കുമെന്ന് അദ്ദേഹം മുന്നറിയിപ്പ് നൽകുന്നു.

നഗരത്തിൽ ഇനി ബാക്കിയുള്ളത് അഞ്ച് ശതമാനത്തോളം മാത്രം വരുന്ന ജലാശയങ്ങളും പച്ചപ്പുമാണെന്നും, റിയൽ എസ്റ്റേറ്റ് താല്പര്യങ്ങൾക്ക് വേണ്ടി സർക്കാരിന്റെ ഭാഗത്തുനിന്നുണ്ടാകുന്ന ഇത്തരം നീക്കങ്ങൾ ജനങ്ങളോടുള്ള വഞ്ചനയാണെന്നും സിറ്റിസൺസ് അജണ്ട ഫോർ ബംഗളൂരു സ്ഥാപകൻ സന്ദീപ് അനിരുദ്ധൻ ആരോപിച്ചു.

എതിർപ്പുകൾ പരിഗണിക്കുമെന്ന് അധികൃതർ

അതേസമയം, തടാകങ്ങളുടെയും മഴവെള്ളക്കാനകളുടെയും ബഫർ സോണുകളിലൂടെ റോഡുകൾ നിർമിക്കാൻ നിലവിലെ നിയമം അനുവദിക്കുന്നുണ്ടെന്നാണ് ജി.ബി.എ ചീഫ് കമ്മീഷണർ മഹേശ്വർ റാവുവിന്റെ വിശദീകരണം. പൊതുജനങ്ങളിൽ നിന്നും വ്യക്തമായ എതിർപ്പുകളോ നിർദേശങ്ങളോ ഉയർന്നുവന്നാൽ അത് പരിഗണിച്ച് റോഡുകളുടെ അലൈൻമെന്റിൽ ആവശ്യമായ മാറ്റങ്ങൾ വരുത്താൻ തയ്യാറാണെന്നും അദ്ദേഹം വ്യക്തമാക്കി.