ബെംഗളൂരു: പ്രണയബന്ധങ്ങൾ വേർപിരിയുന്നതിനെ തുടർന്നുണ്ടാകുന്ന മാനസിക വിഷമങ്ങളിൽ ജീവനക്കാർക്ക് താങ്ങാകാൻ വേറിട്ട അവധി നയവുമായി ബെംഗളൂരു ആസ്ഥാനമായി പ്രവർത്തിക്കുന്ന പ്രമുഖ ഫിൻടെക് കമ്പനിയായ ‘സ്റ്റോക്ക്ഗ്രോ’ (StockGro). പങ്കാളിയുമായി വേർപിരിയുന്ന ജീവനക്കാർക്കായി തുടർച്ചയായി 7 ദിവസത്തെ ശമ്പളത്തോടുകൂടിയ ‘ബ്രേക്ക്-അപ്പ് ലീവ്’ നൽകുമെന്നാണ് കമ്പനി പ്രഖ്യാപിച്ചിരിക്കുന്നത്.
കമ്പനിയിലെ ജീവനക്കാരെ സ്വന്തം കുടുംബത്തെപ്പോലെയാണ് കാണുന്നതെന്നും, വ്യക്തിജീവിതത്തിൽ കടുത്ത മാനസിക പ്രതിസന്ധികൾ നേരിടുന്ന ഘട്ടങ്ങളിൽ അവർക്കൊപ്പം നിൽക്കുക എന്നതാണ് ഈ തീരുമാനത്തിന് പിന്നിലെ പ്രധാന ലക്ഷ്യമെന്നും കമ്പനി സ്ഥാപകൻ അജയ് ലഖോട്ടിയ വ്യക്തമാക്കി. തികഞ്ഞ പരസ്പര വിശ്വാസത്തിലാണ് ഈ അവധി അനുവദിക്കുന്നത്. പ്രണയം തകർന്നതിന് തെളിവുകളോ മറ്റ് ചാറ്റുകളുടെ സ്ക്രീൻഷോട്ടുകളോ ജീവനക്കാർ കമ്പനിക്ക് മുന്നിൽ ഹാജരാക്കേണ്ടതില്ല. അവധി ലഭിക്കാൻ ജീവനക്കാരന്റെ വാക്ക് മാത്രം മതിയാകും. 7 ദിവസത്തിൽ കൂടുതൽ സമയം ആവശ്യമായി വരുന്നവർക്ക് മാനേജ്‌മെന്റിന്റെ വിവേചനാധികാരത്തിന് വിധേയമായി ലീവ് ദീർഘിപ്പിച്ചു നൽകുകയും ചെയ്യും.
ശാരീരിക അസുഖങ്ങൾക്കും കുടുംബത്തിലെ വിയോഗങ്ങൾക്കും അവധി നൽകുന്നതുപോലെ, പ്രണയ തകർച്ച മൂലമുണ്ടാകുന്ന മാനസിക പ്രയാസങ്ങളെയും അർഹമായ പരിഗണനയോടെ കാണണമോ എന്ന കാര്യത്തിൽ കോർപ്പറേറ്റ് ലോകത്ത് വലിയ ചർച്ചകൾക്ക് ഈ തീരുമാനം വഴിവെച്ചിട്ടുണ്ട്. ഇന്ത്യൻ തൊഴിൽ നിയമപ്രകാരം ജീവനക്കാർക്ക് ലഭിക്കേണ്ട നിയമപരമായ അവകാശമല്ല ഇതെന്ന് കമ്പനി ചൂണ്ടിക്കാണിക്കുന്നു. ഉൽപ്പാദനക്ഷമത മാത്രം നോക്കാതെ ജീവനക്കാരുടെ മാനസികാരോഗ്യത്തിന് പ്രാധാന്യം നൽകുന്ന ഇത്തരം നയങ്ങൾ കോർപ്പറേറ്റ് സംസ്‌കാരത്തിൽ വേറിട്ടൊരു മാതൃകയാണ് തീർക്കുന്നത്.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
