ബെംഗളൂരു: കർണാടക സർക്കാരിന്റെ പ്രമുഖ ക്ഷേമപദ്ധതിയായ ഗൃഹലക്ഷ്മി യോജനയുടെ അർഹതാ മാനദണ്ഡങ്ങളിൽ മാറ്റങ്ങൾ വരുത്തിക്കൊണ്ട് സർക്കാർ പുതിയ മാർഗ്ഗനിർദ്ദേശങ്ങൾ പുറപ്പെടുവിച്ചു. അർഹരായ ഗുണഭോക്താക്കൾക്ക് മാത്രം ആനുകൂല്യം ഉറപ്പാക്കുന്നതിനും പദ്ധതിയിലെ ക്രമക്കേടുകൾ തടയുന്നതിനുമായി സംസ്ഥാന സർക്കാർ നടപടികൾ കർശനമാക്കുകയാണ്. ഇതിന്റെ ഭാഗമായി എസ്‌ഐആർ (SIR) പ്രക്രിയ പൂർത്തിയാക്കിയ ശേഷം വിവരങ്ങളുടെ പുനഃപരിശോധന ആരംഭിക്കും. പദ്ധതി സംസ്ഥാനത്തെ നിവാസികൾക്ക് മാത്രമായി പരിമിതപ്പെടുത്താനുള്ള നിർണ്ണായക നീക്കത്തിലാണ് അധികൃതർ.
പുതിയ മാനദണ്ഡങ്ങൾ
പദ്ധതിയുടെ ആനുകൂല്യം ലഭിക്കുന്നതിനായി ഗുണഭോക്താക്കളായ സ്ത്രീകളുടെ വിവരം കൂടാതെ ഭർത്താവിന്റെ വിവരങ്ങളും ബന്ധിപ്പിക്കുന്നത് ഇനിമുതൽ നിർബന്ധമാണ്. ബാങ്ക് അക്കൗണ്ടുകളിൽ മുൻകാല കുടിശ്ശികയോ വായ്പാ ബാധ്യതകളോ ഉണ്ടാകരുതെന്നും വ്യക്തമാക്കുന്നുണ്ട്. റേഷൻ കാർഡിലും ബാങ്ക് രേഖകളിലും നൽകിയിട്ടുള്ള പേരും വിലാസവും പൂർണ്ണമായും ഒരേപോലെയായിരിക്കണം. റേഷൻ കാർഡ് പരിശോധനയ്ക്ക് പുറമെ, കൃത്യമായ ആൾമാറാട്ടം തടയുന്നതിനായി മുഖം തിരിച്ചറിയൽ (ഫേഷ്യൽ റെക്കഗ്നിഷൻ) സംവിധാനവും നിർബന്ധമാക്കിയിട്ടുണ്ട്.
സർക്കാരിനെതിരെ രൂക്ഷവിമർശനവുമായി പ്രതിപക്ഷം
പുതിയ മാർഗ്ഗനിർദ്ദേശങ്ങൾ പുറത്തുവന്നതിന് പിന്നാലെ കോൺഗ്രസ് സർക്കാരിനെതിരെ കടുത്ത ആക്രമണവുമായി പ്രതിപക്ഷ നേതാവ് ആർ. അശോക് രംഗത്തെത്തി. സംസ്ഥാനത്തെ ആത്മാഭിമാനമുള്ള സ്ത്രീകളെ സർക്കാർ സംശയദൃഷ്ടിയോടെ കാണുകയാണെന്ന് അദ്ദേഹം ആരോപിച്ചു. പ്രതിമാസം നൽകുന്ന 2,000 രൂപയ്ക്കായി സ്ത്രീകളെ വിവിധ വ്യവസ്ഥകൾ പറഞ്ഞ് ഉപദ്രവിക്കുകയാണെന്നും തിരഞ്ഞെടുപ്പ് കാലത്ത് വോട്ട് തട്ടാൻ നൽകിയ വാഗ്ദാനങ്ങളിൽ നിന്ന് സർക്കാർ പിന്മാറാൻ ശ്രമിക്കുകയാണെന്നും അദ്ദേഹം വിമർശിച്ചു.
പ്രതിഷേധത്തിലേക്ക് ബിജെപി
ഖജനാവ് കാലിയായതിനെ തുടർന്ന് പദ്ധതി വിഹിതം നൽകുന്നത് കുറയ്ക്കാനാണ് സർക്കാർ ഇത്തരം പിൻവാതിൽ ഫിൽട്ടർ തന്ത്രങ്ങൾ മെനയുന്നതെന്ന് ആർ. അശോക് പറഞ്ഞു. ഗുണഭോക്താക്കളുടെ വിവരങ്ങൾ തേടി 17 ചോദ്യങ്ങളുള്ള പുതിയ അപേക്ഷ സമർപ്പിക്കുന്നതും, വീടുതോറും ജീവനക്കാരെ അയച്ച് പരിശോധന നടത്തുന്നതും സ്ത്രീകളെ കുറ്റവാളികളെപ്പോലെ കാണുന്നതിന് തുല്യമാണ്. ആവർത്തിച്ചുള്ള പരിശോധനകളും സർട്ടിഫിക്കറ്റ് ആവശ്യപ്പെടുന്നതും അവസാനിപ്പിക്കണമെന്നും അല്ലാത്തപക്ഷം കന്നഡക്കാരായ അമ്മമാർക്ക് വേണ്ടി സംസ്ഥാനത്തൊട്ടാകെ ശക്തമായ പ്രതിഷേധ പരിപാടികൾ സംഘടിപ്പിക്കുമെന്നും അദ്ദേഹം മുന്നറിയിപ്പ് നൽകി.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
