ഓടിക്കൊണ്ടിരുന്ന കാറിന് തീപിടിച്ച് ഗര്ഭിണിയായ യുവതി വെന്തുമരിച്ചു. കോഴിക്കോട് പേരാമ്പ്ര ചെറുവണ്ണൂര് ഗ്രാമപഞ്ചായത്തിലെ കക്കറ മുക്ക് റോഡില് ആണ് സംഭവം. കക്കറമുക്ക് സ്വദേശി റിജിന് ലാലിന്റെ ഭാര്യ സോനയാണ് മരിച്ചത്. കൂടെയുണ്ടായിരുന്ന ഭര്ത്താവിന് ഗുരുതരമായി പൊള്ളലേറ്റു.
രാത്രി 9.15ഓടെയായിരുന്നു നാടിനെ നടുക്കിയ ദുരന്തം. ആശുപത്രിയില് പോയി മടങ്ങുകയായിരുന്ന ദമ്പതികള് സഞ്ചരിച്ച സ്വിഫ്റ്റ് കാറാണ് പെട്ടെന്ന് കത്തിയമര്ന്നത്.
റോഡിലൂടെ പോവുകയായിരുന്ന കാറില്നിന്ന് പെട്ടെന്ന് തീയും പുകയും ഉയരുന്നത് ശ്രദ്ധയില്പ്പെട്ട ഉടന്തന്നെ നാട്ടുകാര് സംഭവസ്ഥലത്തേക്ക് ഓടിയെത്തുകയായിരുന്നു. കാറിനുള്ളില് ആളുകള് കുടുങ്ങിക്കിടക്കുന്നത് കണ്ട നാട്ടുകാര് തൊട്ടടുത്ത നെല്വയലില്നിന്ന് വെള്ളം കോരിയൊഴിച്ചാണ് തീയണയ്ക്കാനും ഇവരെ പുറത്തെടുക്കാനും ശ്രമിച്ചത്. നാട്ടുകാരുടെ കൃത്യമായ ഇടപെടലിനെത്തുടര്ന്നാണ് റിജിന് ലാലിനെ കാറില്നിന്ന് പുറത്തെടുക്കാനായത്. ഉടന്തന്നെ ഇദ്ദേഹത്തെ ആശുപത്രിയിലേക്ക് മാറ്റി.
