മുംബൈ: തിയേറ്ററുകളിൽ വൻ ബോക്സ് ഓഫീസ് ചലനം സൃഷ്ടിച്ച രൺവീർ സിംഗ് ചിത്രം ‘ധുരന്ധർ 2’ ഒടുവിൽ ഇന്ത്യൻ ഒടിടി പ്രേക്ഷകരിലേക്ക് എത്തുന്നു. റിലീസ് ചെയ്ത് രണ്ട് മാസം പിന്നിടുമ്പോഴും ചിത്രത്തിന്റെ ഒടിടി റിലീസുമായി ബന്ധപ്പെട്ട് വൻ ആശയക്കുഴപ്പങ്ങളാണ് നിലനിന്നിരുന്നത്. വിദേശ രാജ്യങ്ങളിൽ ചിത്രം ഇതിനകം തന്നെ നെറ്റ്ഫ്ലിക്സിൽ സ്ട്രീമിംഗ് ആരംഭിച്ചെങ്കിലും, ഇന്ത്യൻ ആരാധകർക്കായി ചിത്രം എപ്പോൾ ലഭ്യമാകുമെന്ന കാര്യത്തിൽ ഇപ്പോൾ ഔദ്യോഗിക സ്ഥിരീകരണമായിരിക്കുകയാണ്. പ്രമുഖ ഒടിടി പ്ലാറ്റ്ഫോമായ ജിയോ ഹോട്ട്സ്റ്റാറിലൂടെ ജൂൺ 04 മുതൽ ചിത്രം ഇന്ത്യയിൽ കാണാനാകും.
‘ധുരന്ധർ’ ആദ്യ ഭാഗം നെറ്റ്ഫ്ലിക്സിലാണ് റിലീസ് ചെയ്തിരുന്നതെങ്കിലും, രണ്ടാം ഭാഗത്തിന്റെ ഒടിടി അവകാശത്തിനായി പ്രമുഖ പ്ലാറ്റ്ഫോമുകൾ തമ്മിൽ വലിയ മത്സരമാണ് നടന്നത്. ഒടുവിൽ ഇന്ത്യയ്ക്ക് പുറത്തുള്ള സ്ട്രീമിംഗ് അവകാശം നെറ്റ്ഫ്ലിക്സ് സ്വന്തമാക്കിയപ്പോൾ, ഇന്ത്യയിലെ ഡിജിറ്റൽ അവകാശം ജിയോ ഹോട്ട്സ്റ്റാർ നേടിയെടുക്കുകയായിരുന്നു. നിലവിൽ ഐപിഎൽ തത്സമയ സംപ്രേഷണം ചെയ്യുന്ന തിരക്കിലാണ് ജിയോ ഹോട്ട്സ്റ്റാർ. ഐപിഎൽ ആവേശം അവസാനിച്ചതിന് തൊട്ടുപിന്നാലെ വലിയൊരു റിലീസായി ചിത്രം പ്രേക്ഷകരിലേക്ക് എത്തിക്കാനാണ് പ്ലാറ്റ്ഫോം പദ്ധതിയിടുന്നത്.
മാർച്ച് 19-നായിരുന്നു ‘ധുരന്ധർ 2’ തിയേറ്ററുകളിൽ എത്തിയത്. യഥാർത്ഥത്തിൽ അന്ന് റിലീസ് ചെയ്യാനിരുന്ന ‘ടോക്സിക്’ എന്ന ചിത്രത്തിന്റെ റിലീസ് മാറ്റിവെച്ചതിനെ തുടർന്നാണ് ധുരന്ധർ തിയേറ്ററുകളിലേക്ക് എത്തിയത്. പിന്നീട് ടോക്സിക്കിന്റെ റിലീസ് ജൂൺ 4-ലേക്ക് പ്രഖ്യാപിച്ചെങ്കിലും അതും ഇപ്പോൾ മാറ്റിവെച്ചിരിക്കുകയാണ്. കൗതുകകരമായ മറ്റൊരു കാര്യം, ജൂൺ 4-ന് ‘ധുരന്ധർ 2’ ഒടിടിയിൽ എത്തുന്ന അതേ ദിവസം തന്നെയാണ് രാം ചരൺ നായകനാകുന്ന ബിഗ് ബജറ്റ് ചിത്രം ‘പെഡി’ തിയേറ്ററുകളിൽ റിലീസ് ചെയ്യുന്നത്.
ആദിത്യ ധർ സംവിധാനം ചെയ്ത ഈ ഇന്ത്യൻ സ്പൈ ത്രില്ലർ ചിത്രം ലോകമെമ്പാടുമുള്ള തിയേറ്ററുകളിൽ നിന്ന് 1800 കോടി രൂപയുടെ റെക്കോർഡ് കളക്ഷനാണ് വാരിക്കൂട്ടിയത്. രൺവീർ സിംഗിനൊപ്പം ആർ. മാധവൻ, അക്ഷയ് ഖന്ന, അർജുൻ രാംപാൽ, സഞ്ജയ് ദത്ത് തുടങ്ങി വൻ താരനിര അണിനിരന്ന ചിത്രം തിയേറ്ററുകളിലെ പഴയ പല റെക്കോർഡുകളും തകർത്താണ് ബോക്സ് ഓഫീസ് സെൻസേഷനായി മാറിയത്. തിയേറ്ററുകളിലെ വൻ വിജയത്തിന് ശേഷം ഒടിടിയിലും ചിത്രം വലിയ മുന്നേറ്റം നടത്തുമെന്നാണ് സിനിമാ ലോകത്തിന്റെ പ്രതീക്ഷ.
