ബെംഗളൂരു: നഗരത്തിലേക്ക് കാവേരി ജലം എത്തിക്കുന്ന ടാറ്റഗുണിയിലെ 220 കെ.വി.എ പവർ സ്റ്റേഷനിലുണ്ടായ സാങ്കേതിക തകരാറിനെത്തുടർന്ന് ബെംഗളൂരു നഗരത്തിന്റെ വിവിധ ഭാഗങ്ങളിൽ ജലവിതരണം പൂർണ്ണമായും തടസ്സപ്പെട്ടു.
ബുധനാഴ്ചയാണ് നഗരവാസികളെ ദുരിതത്തിലാഴ്ത്തിയ ഈ തകരാർ സംഭവിച്ചത്. പവർ സ്റ്റേഷനിലെ പ്രശ്നം പരിഹരിക്കുന്നതിനായി വിദഗ്ധ സംഘത്തിന്റെ നേതൃത്വത്തിൽ അടിയന്തര അറ്റകുറ്റപ്പണികൾ ആരംഭിച്ചിട്ടുണ്ട്.
യുദ്ധകാലാടിസ്ഥാനത്തിൽ പണികൾ നടന്നു വരികയാണെന്നും എത്രയും വേഗം ജലവിതരണം പുനഃസ്ഥാപിക്കാൻ നടപടി സ്വീകരിച്ചിട്ടുണ്ടെന്നും ബാംഗ്ലൂർ വാട്ടർ സപ്ലൈ ആൻഡ് സ്വീവറേജ് ബോർഡ് (BWSSB) ചെയർമാൻ രാംപ്രസാദ് മനോഹർ വി. അറിയിച്ചു. നഗരത്തിലെ ഭൂരിഭാഗം പ്രദേശങ്ങളെയും ബാധിച്ച ഈ പ്രതിസന്ധി പരിഹരിക്കാൻ എല്ലാ സജ്ജീകരണങ്ങളും ഏർപ്പെടുത്തിയിട്ടുണ്ടെന്നും അധികൃതർ വ്യക്തമാക്കി.
