ബെംഗളൂരു: കെമ്പെഗൗഡ അന്താരാഷ്ട്ര വിമാനത്താവളത്തിൽ കള്ളക്കടത്ത് ശ്രമം നടത്തിയതായി റവന്യൂ ഇന്റലിജൻസ് ഡയറക്ടറേറ്റ് നടത്തിയ പരിശോധനയിൽ 40 കോടി രൂപയുടെ കൊക്കെയ്നും ബെംഗളൂരു നഗരത്തിലെ ആഫ്രിക്കൻ സംഘങ്ങളുമായുള്ള ബന്ധവും കണ്ടെത്തിയതായി ഏജൻസി ശനിയാഴ്ച അറിയിച്ചു.
രണ്ട് മാസികകളുടെ അകത്ത് ഒളിപ്പിച്ചാണ് കൊക്കെയ്ൻ കടത്തിക്കൊണ്ടുവന്നതെന്ന് ഉദ്യോഗസ്ഥർ പറഞ്ഞു. മാസികകൾക്ക് അസാധാരണമായ കനം തോന്നിച്ചതിനെത്തുടർന്ന് നടത്തിയ പരിശോധനയിലാണ് കണ്ടെത്തൽ.
നാലുകിലോയിലധികം (4,006 ഗ്രാം) കൊക്കെയ്ൻ പിടിച്ചെടുത്തതായും ഇതിന് അന്താരാഷ്ട്ര മാർക്കറ്റിൽ 40 കോടിയോളം രൂപ വിലവരുമെന്നും ഉദ്യോഗസ്ഥർ പറഞ്ഞു.
യാത്രക്കാരന്റെ പേരുവിവരം ലഭ്യമായിട്ടില്ല. ഇയാളുടെപേരിൽ എൻഡിപിഎസ് ആക്ട് പ്രകാരം കേസെടുത്തു. കോടതിയിൽ ഹാജരാക്കിയ ഇയാളെ ജുഡീഷ്യൽ കസ്റ്റഡിയിൽ റിമാൻഡ്ചെയ്തു.
