ബെംഗളൂരുവിൽ വാഹനങ്ങളുടെ എണ്ണം വലിയ തോതിൽ ഉയരുന്നു. 2025 ഫെബ്രുവരി വരെയുള്ള മോട്ടോർ വാഹന രജിസ്ട്രേഷൻ കണക്കുകൾ പ്രകാരം, ബെംഗളൂരുവിൽ രജിസ്റ്റർ ചെയ്തത് 1.2 കോടി വാഹനങ്ങൾ. 2021 മാർച്ച് വരെയുള്ള കണക്കുകളുമായി താരതമ്യം ചെയ്യുമ്പോൾ ഒരു കോടിയിലധികം വാഹനങ്ങളാണ് ബെംഗളൂരുവിൽ വർധിച്ചിരിക്കുന്നത്. അതേസമയം കർണാടകത്തിൽ 2025 ഫെബ്രുവരിവരെ 3.3 കോടി വാഹനങ്ങളാണ് രജിസ്റ്റർ ചെയ്തിരിക്കുന്നത്. 2021 മാർച്ച് വരെ ഇത് 2.7 കോടി ആയിരുന്നു.
ഗതാഗത വകുപ്പിൻ്റെ ഏറ്റവും പുതിയ രേഖകൾ പ്രകാരം, ബെംഗളൂരുവിലെ റോഡുകളിൽ ഇരുചക്രവാഹനങ്ങൾക്ക് തന്നെയാണ് അപ്രമാദിത്വം. 2025 ഫെബ്രുവരിവരെ ബെംഗളൂരുവിൽ 82.4 ലക്ഷം ഇരുചക്രവാഹനങ്ങൾ രജിസ്റ്റർ ചെയ്തു. 2021 മാർച്ചുവരെ 66.7 ലക്ഷം ഇരുചക്രവാഹനങ്ങൾ ആയിരുന്നു രജിസ്റ്റർ ചെയ്തിരുന്നത്. 2021 മാർച്ച് വരെയുള്ള കണക്കുകളുമായി താരതമ്യം ചെയ്യുമ്പോൾ ബെംഗളൂരുവിലെ ഇരുചക്രവാഹനങ്ങളുടെ എണ്ണത്തിൽ 23.5 ശതമാനം വർധനയാണ് രേഖപ്പെടുത്തിയിരിക്കുന്നത്. കർണാടകത്തിലുടനീളം ഫെബ്രുവരി വരെ 2.3 കോടി ഇരുചക്ര വാഹനങ്ങൾ രജിസ്റ്റർ ചെയ്തിട്ടുണ്ട്.
ബെംഗളൂരുവിലെ റോഡുകളിലൂടെ പായുന്ന കാറുകളുടെ എണ്ണത്തിലും കാര്യമായ വർധന രേഖപ്പെടുത്തിയിട്ടുണ്ട്. ഫെബ്രുവരി വരെ 25.2 ലക്ഷം കാറുകളാണ് രജിസ്റ്റർ ചെയ്തിരിക്കുന്നത്. 2021 മാർച്ച് വരെ ഇത് 20.8 ലക്ഷമായിരുന്നു. ഏകദേശം 21 ശതമാനത്തിൻ്റെ വർധനയാണ് രേഖപ്പെടുത്തിയിരിക്കുന്നത്. കർണാടകത്തിൽ ഫെബ്രുവരി വരെ 48.9 ലക്ഷം കാറുകൾ രജിസ്റ്റർ ചെയ്തിട്ടുണ്ട്.
അതേസമയം നിർമാണ ഉപകരണ വാഹനങ്ങളുടെ എണ്ണത്തിൽ വൻ വർധനവാണ് കർണാടകത്തിൽ രേഖപ്പെടുത്തിയിരിക്കുന്നത്. 2020 മാർച്ച് വരെ 4816 വാഹനങ്ങളാണ് രജിസ്റ്റർ ചെയ്തിരുന്നതെങ്കിൽ 2025 ഫെബ്രുവരി വരെ രജിസ്റ്റർ ചെയ്തത് 21495 വാഹനങ്ങളാണ്. കർണാടകത്തിൽ അടിസ്ഥാന വികസനത്തിനും നിർമാണത്തിനും ഉത്തേജനം ലഭിച്ചതാണ് നിർമാണ ഉപകരണ വാഹനങ്ങളുടെ എണ്ണം ഉയരാൻ കാരണമായത്.
ഗതാഗത വാഹനങ്ങളുടെ കണക്ക് പരിശോധിക്കുകയാണെങ്കിൽ മോട്ടോർ ക്യാബുകളുടെ എണ്ണം ഫെബ്രുവരിവരെ 4.2 ലക്ഷമായി ഉയർന്നു. 2023 മാർച്ച് വരെ ഇത് 3.6 ലക്ഷമായിരുന്നു. കൂടാതെ, മുച്ചക്ര വാഹനങ്ങളുടെ എണ്ണത്തിൽ വർധന രേഖപ്പെടുത്തി. മൂന്ന് സീറ്റുള്ള ഓട്ടോറിക്ഷകളുടെ എണ്ണം 2020 മാർച്ച് വരെ 7.2 ലക്ഷമായിരുന്നെങ്കിൽ 2025 ഫെബ്രുവരിവരെ ഇത് 8.8 ലക്ഷമായി. ഏകദേശം 2.9 കോടി ട്രാൻസ്പോർട്ട് വാഹനങ്ങളും 2.9 കോടി നോൺ ട്രാൻസ്പോർട്ട് വാഹനങ്ങളും ബെംഗളൂരുവിൽ രജിസ്റ്റർ ചെയ്തിട്ടുണ്ട്. ട്രക്ക്, ലോറി പോലുള്ള വാണിജ്യ വാഹനങ്ങളുടെ എണ്ണവും വർധിച്ചിട്ടുണ്ട്. ട്രക്ക്, ലോറി പോലുള്ള വാണിജ്യ വാഹനങ്ങൾ ബെംഗളൂരുവിൽ ഫെബ്രുവരി വരെ 1.9 ലക്ഷം രജിസ്റ്റർ ചെയ്തു.
