ബെംഗളൂരു: ഉഡുപ്പി ജില്ലയില് കാർക്കളക്കടുത്ത ഉമിക്കല് മലയിലെ തീം പാർക്കില് സ്ഥാപിച്ച പരശുരാമൻ പ്രതിമ സംബന്ധിച്ച് മറ്റൊരു കേസ്.
വെങ്കലം എന്ന വ്യാജേന ഫൈബർ പ്രതിമ സ്ഥാപിച്ചെന്ന പരാതിയില് ക്രിഷ് ആർട്ട് വേള്ഡിലെ ശില്പി കൃഷ്ണ നായ്കിനെതിരെ കാർക്കള ടൗണ് പോലീസ് കേസെടുത്തു.
കാർക്കള നള്ളൂരിലെ കൃഷ്ണ ഷെട്ടിയുടെ പരാതിയിലാണ് കേസ്.
പ്രതിമ സ്ഥാപിക്കാൻ കൃഷ്ണ നായ്ക് ഉഡുപ്പി നിർമിതി കേന്ദ്രയില് നിന്ന് 1.30 കോടി രൂപ കൈപ്പറ്റി വഞ്ചന കാണിച്ചെന്ന് പരാതിയില് പറഞ്ഞു.
നിർമിതിയിലെ നിലവാരമില്ലായ്മ കാരണം അപകടാവസ്ഥയിലായ പ്രതിമ അധികൃതർ ഒളിപ്പിച്ചു കടത്തിക്കൊണ്ടുപോയത് കോണ്ഗ്രസ് നേതാക്കളും നാട്ടുകാരുമാണ് പുറത്തു കൊണ്ടുവന്നിരുന്നത്.
കഴിഞ്ഞ വർഷം ജനുവരി 27ന് അനാച്ഛാദനം ചെയ്ത വെങ്കല പ്രതിമക്ക് ഗുണനിലവാരം ഇല്ലെന്ന് അന്നേ ആക്ഷേപം ഉയർന്നിരുന്നു.
ആ വർഷം മേയില് തെരഞ്ഞെടുപ്പ് നടക്കാനിരിക്കെ അന്നത്തെ ഊർജ മന്ത്രി കാർക്കള എം.എല്.എ വി.സുനില് കുമാർ തന്റെ സ്വപ്ന പദ്ധതിയുടെ ഭാഗമായ പ്രതിമ ഉദ്ഘാടനം ചെയ്യുകയായിരുന്നെന്നാണ് ആക്ഷേപം ഉയർന്നത്.
തീം പാർക്കിലേക്ക് വിനോദ സഞ്ചാരികളെ വിലക്കി കാർക്കള തഹസില്ദാർ ഉത്തരവിറക്കിയതിന് പിന്നാലെ പ്രതിമ കറുത്ത പ്ലാസ്റ്റിക് ഷീറ്റുകള് കൊണ്ട് പൊതിഞ്ഞു.
മിനുക്കുപണികള്ക്ക് ആണെന്നായിരുന്നു അധികൃതരുടെ വിശദീകരണം.
ഉഡുപ്പി ജില്ല ചുമതലയുള്ള മന്ത്രി ലക്ഷ്മി ഹെബ്ബാള്കർ സ്ഥലം സന്ദർശിച്ച് അധികൃതരുമായി ചർച്ച നടത്തിയിരുന്നു.
ഭൂ നിരപ്പില് നിന്ന് 50 അടി ഉയരത്തില് സ്ഥാപിച്ച 33 അടി ഉയരമുള്ള പ്രതിമാ നിർമാണത്തിന് 15 ടണ് വെങ്കലം ഉപയോഗിച്ചു എന്നാണ് കണക്ക്.
തീം പാർക്ക് നിർമാണ അഴിമതി ചൂണ്ടിക്കാട്ടിയും കാലികള്ക്ക് മേയാനുള്ള (ഗോമാല) ഭൂമി പാർക്കാക്കുന്നതിനെതിരെയും ശ്രീരാമസേന സ്ഥാപക നേതാവ് പ്രമോദ് മുത്തലിഖ് സമർപ്പിച്ച ഹർജി ഹൈക്കോടതി തള്ളിയിരുന്നു.
10 കോടി രൂപ ചെലവില് കർണാടക വിനോദ സഞ്ചാര, സാംസ്കാരിക വകുപ്പുകളുടെ സംയുക്ത സംരംഭമായാണ് പാർക്ക് ഒരുക്കിയത്.
സമുദ്ര നിരപ്പില് നിന്ന് 450 അടി ഉയരത്തിലുള്ള മലയില് മ്യൂസിയം, 500 ഇരിപ്പിടം, റസ്റ്റാറന്റ് തുടങ്ങിയ സൗകര്യങ്ങള് പാർക്കില് ഉണ്ട്.
പാർക്കില് സ്ഥാപിച്ച പരശുരാമ പ്രതിമയുടെ നിർമാണ സാമഗ്രികള് ഗുണനിലവാരം കുറഞ്ഞതാണെന്ന് ഹർജിയില് ആരോപണമുണ്ടായിരുന്നു.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
