ബെംഗളൂരു: ദസറ ആഘോഷങ്ങൾക്കിടെ നാടിനെ നടുക്കിയ ഒൻപത് വയസ്സുകാരിയായ പെൺകുട്ടിയെ ബലാത്സംഗം ചെയ്ത് കൊലപ്പെടുത്തിയ കേസിൽ പ്രതിക്ക് വധശിക്ഷ. കേസിൽ കാർത്തിക് (32) എന്നയാളെ കുറ്റക്കാരനായി കണ്ടെത്തിയതിനെ തുടർന്ന് മൈസൂരു ലെ എഫ്‌ടിഎസ്‌സി-1 (Fast Track Special Court) ജഡ്ജി അനിൽ പി. വാഗാഡെയാണ് ചരിത്രപരമായ ഈ വിധി പുറപ്പെടുവിച്ചത്.
കഴിഞ്ഞ വർഷത്തെ മൈസൂരു ദസറ ഉത്സവത്തോടനുബന്ധിച്ചായിരുന്നു ക്രൂരമായ സംഭവം നടന്നത്. കലബുറഗിയിൽ നിന്ന് കച്ചവട ആവശ്യങ്ങൾക്കായി മൈസൂരിലെത്തിയ കുടുംബത്തിലെ പെൺകുട്ടിയാണ് ദാരുണമായി കൊല്ലപ്പെട്ടത്. ദസറ എക്സിബിഷൻ ഗ്രൗണ്ടിന് സമീപം ബലൂൺ വിൽപ്പന നടത്തുകയായിരുന്ന പെൺകുട്ടി രാത്രി കുടുംബത്തോടൊപ്പം താൽക്കാലിക ടെന്റിൽ ഉറങ്ങിക്കിടക്കുമ്പോഴാണ് പ്രതി തട്ടിക്കൊണ്ടുപോയത്. തുടർന്ന് പെൺകുട്ടിയെ ക്രൂരമായി ബലാത്സംഗത്തിന് ഇരയാക്കി കൊലപ്പെടുത്തിയ ശേഷം മൃതദേഹം ഉപേക്ഷിച്ച് പ്രതി കടന്നുകളയുകയായിരുന്നു.
സംസ്ഥാനത്തുടനീളം വലിയ ജനരോഷത്തിന് ഇടയാക്കിയ സംഭവത്തിൽ മൈസൂരു നസറാബാദ് പോലീസ് അതിവേഗം അന്വേഷണം ആരംഭിക്കുകയും 24 മണിക്കൂറിനുള്ളിൽ തന്നെ പ്രതിയായ കാർത്തിക്കിനെ പിടികൂടുകയും ചെയ്തു. സർക്കാരിന് വേണ്ടി പബ്ലിക് പ്രോസിക്യൂട്ടർ ജയന്തി ഹാജരായ കേസിൽ ദീർഘമായ വാദപ്രതിവാദങ്ങൾക്കൊടുവിലാണ് പ്രതിക്ക് പരമാവധി ശിക്ഷ തന്നെ കോടതി ഉറപ്പാക്കിയത്. ദരിദ്ര കുടുംബത്തിന് നീതി ലഭ്യമാക്കുന്നതോടൊപ്പം സമൂഹത്തിലെ കുറ്റവാളികൾക്ക് കൃത്യമായ മുന്നറിയിപ്പ് നൽകുന്നതുമാണ് ഈ വിധിയെന്ന് പൊതുജനങ്ങൾ അഭിപ്രായപ്പെട്ടു.
