ബെംഗളൂരു: സൗജന്യ വൈദ്യുതി നൽകുന്ന സംസ്ഥാന സർക്കാറിന്റെ ‘ഗ്രഹജ്യോതി’ പദ്ധതിയിലെ അനർഹരായ ഗുണഭോക്താക്കളെ കണ്ടെത്തി ഒഴിവാക്കാനുള്ള നടപടികൾ അവസാന ഘട്ടത്തിലേക്ക്. അർഹത തെളിയിക്കാനുള്ള വിവരങ്ങൾ കൈമാറാൻ വിസമ്മതിക്കുകയോ വിവരശേഖരണ സമയത്ത് ലഭ്യമാകാതിരിക്കുകയോ ചെയ്ത ആയിരക്കണക്കിന് ഉപഭോക്താക്കൾക്കായി 15 ദിവസത്തെ ഇളവ് കൂടി അനുവദിക്കണമെന്ന് ബെസ്കോം (Bescom) സംസ്ഥാന സർക്കാരിനോട് ആവശ്യപ്പെട്ടു.
പ്രതിമാസം 200 യൂണിറ്റ് വരെ സൗജന്യ വൈദ്യുതി നൽകുന്ന പദ്ധതിയിലെ ക്രമക്കേടുകൾ തടയാൻ ഓഗസ്റ്റിലാണ് ബെസ്കോം വിപുലമായ പരിശോധന ആരംഭിച്ചത്. ബെസ്കോമിന് കീഴിലുള്ള 68.9 ലക്ഷത്തോളം വരുന്ന ഗുണഭോക്താക്കളിൽ 98-99 ശതമാനം ആളുകളുടെയും വിവരശേഖരണം പൂർത്തിയായിട്ടുണ്ട്. എന്നാൽ ചില വീടുകൾ പൂട്ടിക്കിടക്കുന്നതിനാലും ചിലർ വിവരങ്ങൾ നൽകാൻ തയ്യാറാകാത്തതിനാലും ഇവരുടെ പരിശോധന പൂർത്തിയാക്കാൻ കഴിഞ്ഞിട്ടില്ല.
ഓഗസ്റ്റിൽ തുടങ്ങി സെപ്റ്റംബറിലേക്ക് നീട്ടിയ പരിശോധനയിൽ രണ്ട് തരത്തിലുള്ള ഉപഭോക്താക്കളെയാണ് തിരിച്ചറിഞ്ഞിട്ടുള്ളത്. വ്യക്തിഗത വിവരങ്ങൾ പങ്കുവെക്കാൻ വിസമ്മതിച്ച 5.5 ലക്ഷം ഉപഭോക്താക്കളും, വീടുകൾ പൂട്ടിക്കിടക്കുകയോ ഉടമകൾ വിദേശത്താവുകയോ ചെയ്തതിനാൽ ബന്ധപ്പെടാൻ കഴിയാത്ത 18 ലക്ഷത്തോളം പേരും ഇതിൽ ഉൾപ്പെടുന്നു. ഇവർക്ക് അർഹത തെളിയിക്കാൻ അവസാനമായി ഒരു അവസരം കൂടി നൽകാനാണ് ബെസ്കോം ലക്ഷ്യമിടുന്നത്.
സർക്കാർ ഈ 15 ദിവസത്തെ സമയപരിധി അനുവദിക്കുകയാണെങ്കിൽ, ഉപഭോക്താക്കൾക്ക് നേരിട്ടെത്തി വിവരങ്ങൾ സമർപ്പിക്കാം. മുൻപത്തെപ്പോലെ ഉദ്യോഗസ്ഥർ വീടുകളിലേക്ക് വരില്ല പകരം ഉപഭോക്താക്കൾ അടുത്തുള്ള ബെസ്കോം സബ് ഡിവിഷൻ ഓഫീസിലെത്തി ആവശ്യമായ രേഖകൾ ഹാജരാക്കി അർഹത തെളിയിക്കേണ്ടിവരും. അല്ലാത്തപക്ഷം ഇവരെ ഗ്രഹജ്യോതി പദ്ധതിയുടെ ഗുണഭോക്തൃ പട്ടികയിൽ നിന്ന് ശാശ്വതമായി ഒഴിവാക്കുമെന്നും അധികൃതർ വ്യക്തമാക്കി.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
