ബെംഗളൂരു: തുമക്കൂരുവിൽ തെങ്ങിന്മേൽ കയറിയ പുള്ളിപ്പുലി വനംവകുപ്പ് ഉദ്യോഗസ്ഥരുടെ മുന്നിൽനിന്ന് രക്ഷപ്പെട്ടു. തുമക്കൂരു താലൂക്കിലെ തിമ്മസന്ദ്ര ഗ്രാമത്തിന് സമീപമാണ് സംഭവം. വ്യാഴാഴ്ച രാവിലെയാണ് സംഭവം നടന്നത്.
ഒരു വീടിന് സമീപത്തുനിന്ന് കോഴിയെ പിടിച്ചെടുത്ത പുള്ളിപ്പുലി, നായ്ക്കൾ കുരച്ചതിനെത്തുടർന്ന് സമീപത്തെ തെങ്ങിൽ കയറുകയായിരുന്നു. ഉടൻതന്നെ നാട്ടുകാർ വനംവകുപ്പ് ഉദ്യോഗസ്ഥരെ വിവരമറിയിച്ചു. തുടർന്ന് സ്ഥലത്തെത്തിയ ഉദ്യോഗസ്ഥർ പുലിയെ പിടികൂടാൻ ശ്രമിച്ചെങ്കിലും, ഇവരുടെ കൺമുന്നിൽവെച്ച് പുലി തെങ്ങിൽനിന്ന് താഴെയിറങ്ങി രക്ഷപ്പെടുകയായിരുന്നു.
പ്രദേശം തുമക്കൂരു സർവകലാശാലയുടെ ജ്ഞാനഗിരി കാമ്പസിന് സമീപത്തായതിനാൽ വിദ്യാർത്ഥികളിലും വലിയ ആശങ്കയാണ് നിലനിൽക്കുന്നത്.
ജനങ്ങളുടെ പ്രതിഷേധവും ആശങ്കയും
പ്രദേശത്ത് ഒറ്റപ്പെട്ട വീടുകളും കുട്ടികളും ഉള്ളതിനാൽ പുലിയെ എത്രയും പെട്ടെന്ന് പിടികൂടണമെന്ന് നാട്ടുകാർ വനംവകുപ്പിനോട് ആവശ്യപ്പെട്ടു. കാലികളെ മേയാൻ കൊണ്ടുപോകാൻ കഴിയാത്ത അവസ്ഥയാണെന്നും പ്രദേശത്ത് ഇതിനുമുൻപും ആടുകളെയും കന്നുകാലികളെയും പുള്ളിപ്പുലി ആക്രമിച്ച് കൊന്നിട്ടുണ്ടെന്നും വില്ലേജുകാർ ആരോപിച്ചു.
പുലിയുടെ സാന്നിധ്യം അറിഞ്ഞിട്ടും അത് രക്ഷപ്പെടാൻ ഇടയാക്കിയ ഉദ്യോഗസ്ഥരുടെ നടപടിയെ നാട്ടുകാർ രൂക്ഷമായി വിമർശിച്ചു. എന്തെങ്കിലും അത്യാഹിതം സംഭവിച്ചാൽ വനംവകുപ്പ് ഉത്തരവാദിയായിരിക്കുമെന്നും, പുലിയുടെ ആക്രമണം തടയാൻ അടിയന്തര നടപടി സ്വീകരിക്കണമെന്നും നാട്ടുകാർ ആവശ്യപ്പെട്ടു.
