നോബ്രോക്കർ വഴി വീട് എടുത്തു, അഡ്വാൻസും പോയി; ബെംഗളൂരുവിൽ മലയാളിയടക്കം നേരിട്ട ദുരനുഭവം റെഡ്ഡിറ്റിൽ ചർച്ചയാകുന്നു

ബെംഗളൂരു: വ്യക്തിപരമായ അനുഭവങ്ങളും പ്രശ്നങ്ങൾക്കുള്ള പരിഹാരങ്ങളും പങ്കുവെക്കുന്ന പ്രമുഖ പ്ലാറ്റ്‌ഫോമായ റെഡ്ഡിറ്റിൽ ബെംഗളൂരുവിൽ നിന്നുള്ള ഒരു വാടകക്കാരന്റെ ദുരനുഭവം വലിയ ചർച്ചയാകുന്നു. മുൻകൂർ പണം നൽകി വാടകയ്ക്ക് എടുത്ത വീട് കൃത്യസമയത്ത് നൽകാനോ അഡ്വാൻസ് തുക തിരികെ നൽകാനോ വീട്ടുടമസ്ഥൻ തയ്യാറാകാത്തതിനെത്തുടർന്നാണ് യുവാവ് സഹായം തേടി റെഡ്ഡിറ്റിനെ സമീപിച്ചത്.

വാഗ്ദാനങ്ങളും അവസാന നിമിഷത്തെ പ്രതിസന്ധികളും

ഇന്ദിരാനഗറിലെ ഒരു വാടക വീട്ടിലേക്ക് മാറാൻ തീരുമാനിച്ച യുവാവ്, ഇതിനായി ‘നോബ്രോക്കർ’ (NoBroker) പ്ലാറ്റ്‌ഫോം വഴിയാണ് വീട്ടുടമ നേരിട്ട് ലിസ്റ്റ് ചെയ്ത ഫ്ലാറ്റ് കണ്ടെത്തിയത്. ആദ്യം ബന്ധപ്പെട്ടപ്പോൾ വീട് ഒഴിഞ്ഞുകിടക്കുകയാണെന്നും താമസം മാറാൻ ഉടൻ തന്നെ ഒരു തീയതിയും വീട്ടുടമ നൽകി. എന്നാൽ കരാർ ഒപ്പിടുന്നതിന് മുമ്പ് മുഴുവൻ സെക്യൂരിറ്റി ഡെപ്പോസിറ്റും നൽകണമെന്ന് വീട്ടുടമ ആവശ്യപ്പെട്ടു. തുടർന്ന് നടത്തിയ ചർച്ചകൾക്കൊടുവിൽ ഒരു മാസത്തെ വാടകയ്ക്ക് തുല്യമായ 20,000 രൂപ അഡ്വാൻസായി നൽകാൻ ധാരണയായി. താമസം മാറിയ ശേഷം ബാക്കി തുക നൽകാമെന്നായിരുന്നു വ്യവസ്ഥ.

കബളിക്കപ്പെട്ട വാടകക്കാരൻ

തുടർന്ന് നിശ്ചയിച്ച തീയതിയിൽ യുവാവ് ഫ്ലാറ്റിൽ എത്തിയപ്പോഴാണ് യാഥാർത്ഥ്യം അറിയുന്നത്. ഫ്ലാറ്റിൽ മുമ്പ് താമസിച്ചിരുന്നവർ വീട് ഒഴിഞ്ഞിരുന്നില്ലെന്നും, ഒഴിയാൻ ഇരുപത് ദിവസം കൂടി വേണമെന്നുമാണ് അവർ ആവശ്യപ്പെട്ടത്. ഈ വിവരം വീട്ടുടമസ്ഥൻ തന്നോട് മുൻകൂട്ടി പറഞ്ഞിരുന്നില്ലെന്ന് യുവാവ് പറയുന്നു. അതുവരെ കാത്തിരിക്കാൻ സാധിക്കാത്തതിനാൽ മറ്റൊരു വീട് നോക്കുമെന്നും, അല്ലെങ്കിൽ അഡ്വാൻസ് തുക തിരികെ നൽകണമെന്നും യുവാവ് ആവശ്യപ്പെട്ടെങ്കിലും വീട്ടുടമ പണം നൽകാൻ വിസമ്മതിച്ചു. മറ്റൊരു വീട് അന്വേഷിക്കുകയാണെങ്കിൽ 20,000 രൂപ നഷ്ടപ്പെടുത്തേണ്ടിവരുമെന്ന അവസ്ഥയിലാണ് യുവാവ് പെട്ടുപോയത്.

റെഡ്ഡിറ്റ് ഉപയോക്താക്കളുടെ നിർദ്ദേശങ്ങൾ

രേഖാമൂലമുള്ള കരാർ ഇല്ലാത്തതിനാലും വാക്കാലുള്ള ധാരണ മാത്രമുള്ളതിനാലും എന്തുചെയ്യണമെന്നറിയാതെ ആശങ്കയിലായ യുവാവ്, r/bangalorentals സബ്‌റെഡിറ്റിൽ പോസ്റ്റ് പങ്കുവെക്കുകയായിരുന്നു. സമാനമായ പ്രശ്നങ്ങൾ നേരിട്ട നിരവധി പേരാണ് പോസ്റ്റിന് താഴെ പ്രതികരണങ്ങളുമായി എത്തിയത്.

പ്രാദേശിക വളണ്ടിയർ ഗ്രൂപ്പായ ‘സെന്റ് ബ്രോസെഫ്’ (St. Broseph) സബ്‌റെഡിറ്റിൽ പോസ്റ്റ് ചെയ്താൽ സഹായം ലഭിക്കുമെന്ന് ഒരാൾ നിർദ്ദേശിച്ചു. താൽക്കാലികമായി ഒരു മാസത്തേക്ക് പേയിംഗ് ഗസ്റ്റ് (PG) അക്കോമഡേഷനിൽ താമസിക്കാനും, കാലതാമസം മൂലമുണ്ടാകുന്ന അധിക ചെലവുകൾ വീട്ടുടമയെ അറിയിക്കാനും മറ്റൊരു ഉപയോക്താവ് പറഞ്ഞു.

അതേസമയം, സ്വയം അഭിഭാഷകനാണെന്ന് പരിചയപ്പെടുത്തിയ ഒരാൾ നൽകിയ നിയമോപദേശം ശ്രദ്ധേയമായി. വീട്ടുടമസ്ഥനുമായി നടത്തിയ ആശയവിനിമയങ്ങളുടെ രേഖാമൂലമുള്ള തെളിവുകൾ സൂക്ഷിക്കാനും, വാട്‌സ്ആപ്പ് വഴി സംഭവങ്ങൾ വ്യക്തമാക്കി സന്ദേശം അയക്കാനും അദ്ദേഹം ഉപദേശിച്ചു. ഉടമയിൽ നിന്ന് മറുപടി ലഭിച്ചില്ലെങ്കിൽ അത് തെളിവായി ഉപയോഗിച്ച് ഒരു അഭിഭാഷകൻ വഴി ലീഗൽ നോട്ടീസ് അയക്കാമെന്നും, ഇതിന് ഏകദേശം 5,000 രൂപ വരെ ചിലവ് വരുമെന്നും അദ്ദേഹം വ്യക്തമാക്കി. ഉപയോക്താക്കൾ പങ്കുവെച്ച അനുഭവങ്ങളെ അടിസ്ഥാനമാക്കിയുള്ളതാണ് ഈ വിവരങ്ങൾ.

ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]