കാൺപൂർ: കോടികളുടെ കുടുംബസ്വത്ത് നഷ്ടപ്പെടുമെന്ന ഭയത്താൽ ഫാർമസ്യൂട്ടിക്കൽസ് വ്യവസായിയായ പിതാവിനെ മകൻ കൊലപ്പെടുത്തിയ സംഭവത്തിൽ ഞെട്ടിക്കുന്ന കൂടുതൽ വിവരങ്ങൾ പുറത്ത്. സെപ്റ്റംബർ അഞ്ചിന് കാൺപൂരിലെ ഇന്ദിരാ നഗറിലുള്ള ഫ്ലാറ്റിൽ 60-കാരനായ വിനീത് മനോച്ചയെ കഴുത്തറുത്ത് കൊല്ലപ്പെട്ട നിലയിൽ കണ്ടെത്തിയ കേസിൽ മകൻ സുബ്രതിനെ പോലീസ് അറസ്റ്റ് ചെയ്തു.
പിതാവിന് മറ്റ് സ്ത്രീകളുമായി ബന്ധമുണ്ടായിരുന്നെന്നും സ്വത്തുക്കൾ അവർക്ക് എഴുതിനൽകുമോ എന്ന ഭയമാണ് കൊലപാതകത്തിലേക്ക് നയിച്ചതെന്നും സുബ്രത് പോലീസിനോട് കുറ്റസമ്മതം നടത്തി. സംഭവസമയത്ത് താനും ഭാര്യ ശാലുവും പാർട്ടിയിൽ പങ്കെടുക്കുകയായിരുന്നു എന്നാണ് സുബ്രത് ആദ്യം പോലീസിന് നൽകിയ മൊഴി. കേസിന്റെ ആദ്യഘട്ടത്തിൽ സംശയം തോന്നി മരുമകൾ ശാലു, ഇവരുടെ മുൻ ജീവനക്കാരൻ വിശാൽ ഗൗതം, കൂട്ടാളി രാജ് കിഷോർ എന്നിവരെ പോലീസ് അറസ്റ്റ് ചെയ്തിരുന്നു.
എന്നാൽ പിന്നീട് നടത്തിയ വിശദമായ അന്വേഷണത്തിലാണ് കേസിൽ നിർണായക വഴിത്തിരിവുണ്ടായത്. കൃത്യം നടത്തുന്നതിനായി പ്രതി ഉപയോഗിച്ച പുതിയ സിം കാർഡിൽ നിന്ന് സുബ്രതിന്റെ ഫോണിലേക്ക് ആറ് തവണ വിളികൾ വന്നതായി പോലീസ് കണ്ടെത്തി. തുടർന്ന് സെപ്റ്റംബർ 23-ന് പോലീസ് സുബ്രതിനെ കസ്റ്റഡിയിലെടുത്ത് ചോദ്യം ചെയ്തതോടെയാണ് ഗൂഢാലോചന പുറത്തായത്.
പിതാവ് മറ്റ് സ്ത്രീകളോടൊപ്പം താമസം തുടങ്ങുമെന്നും സ്വത്ത് കൈവിട്ടുപോകുമെന്നും സുബ്രത് ഭയപ്പെട്ടിരുന്നു. മാസം തോറും പിതാവ് നൽകിയിരുന്ന 40,000 രൂപ കൊണ്ട് 55,000 രൂപയുടെ വായ്പാ തിരിച്ചടവുകൾ വീട്ടാൻ സുബ്രതിന് സാധിച്ചിരുന്നില്ല. തുടർന്നാണ് മുൻ ജീവനക്കാരനായ വിശാലിന് ആറ് ലക്ഷം രൂപ വാഗ്ദാനം ചെയ്ത് കൊലപാതകം സൂത്രധാരണം ചെയ്തത്. പിടിക്കപ്പെട്ടാൽ ഭാര്യ ശാലുവിന്റെ പേര് പറയാൻ സുബ്രത് വിശാലിന് നിർദ്ദേശം നൽകിയിരുന്നതായും പോലീസ് വ്യക്തമാക്കി.
