ബെംഗളൂരു: ഐടി നഗരമായ ബെംഗളൂരുവിൽ ജീവിക്കുക എന്നത് വലിയ ചെലവേറിയ കാര്യമാണെന്നാണ് പൊതുവെയുള്ള സംസാരം. എന്നാൽ സ്വന്തം വീട്ടുചെലവിനേക്കാൾ ഇരട്ടി തുക തങ്ങളുടെ വളർത്തുനായയ്ക്കായി മാറ്റിവെക്കുന്ന ഒരു ബെംഗളൂരു ദമ്പതികളുടെ കഥയാണ് ഇപ്പോൾ സോഷ്യൽ മീഡിയയിൽ ചർച്ചയാകുന്നത്. സ്വന്തം പലചരക്ക് സാധനങ്ങൾ വാങ്ങുന്നതിനേക്കാൾ വലിയ തുകയാണ് ഇവർ നായയുടെ ആഡംബരങ്ങൾക്കായി പ്രതിമാസം ചെലവിടുന്നത്.
നഗരങ്ങളിൽ അടുത്തിടെ വർദ്ധിച്ചുവരുന്ന ‘ഡിങ്ക്വാഡ്’ (DINKWAD – Double Income, No Kids, With A Dog) അഥവാ ‘ഇരട്ടവരുമാനമുള്ള, കുട്ടികളില്ലാത്ത, നായയെ വളർത്തുന്ന ദമ്പതികൾ’ എന്ന ജീവിതശൈലിയുടെ ഒടുവിലത്തെ ഉദാഹരണമാണിത്. ഇന്ദിരാനഗറിലെ ഈ ഐടി ദമ്പതികളുടെ വീട് സന്ദർശിച്ച ശേഷം ഗോക്വസ്റ്റ് സ്ഥാപകനായ ഗഗൻ അറോറയാണ് കൗതുകകരമായ ഈ വിവരങ്ങൾ പങ്കുവെച്ചത്.
ഒരു ഗോൾഡൻ റിട്രീവർ ഇനത്തിൽപ്പെട്ട നായയെയാണ് ഈ ദമ്പതികൾ വളർത്തുന്നത്. ഇതിന്റെ ഉയർന്ന നിലവാരമുള്ള ഭക്ഷണം, കളിപ്പാട്ടങ്ങൾ, ഗ്രൂമിങ്, കൃത്യമായ വെറ്ററിനറി പരിശോധനകൾ, ആരോഗ്യസംരക്ഷണം എന്നിവയ്ക്കായി മാത്രം പ്രതിമാസം 12,000 മുതൽ 15,000 രൂപ വരെ ഇവർ ചെലവഴിക്കുന്നു. നായയുടെ ഭക്ഷണത്തിനായി മാത്രം ഫ്രിഡ്ജിൽ പ്രത്യേക ഷെൽഫ് തന്നെയുണ്ട്. ദിവസേനയുള്ള ചിക്കൻ കഷണങ്ങൾ ഉൾപ്പെടെയുള്ള വിഭവങ്ങൾ കൃത്യമായി പാകം ചെയ്താണ് ഇതിൽ സൂക്ഷിക്കുന്നത്. സ്വന്തം ആഗ്രഹങ്ങളേക്കാൾ വളർത്തുമൃഗങ്ങളുടെ പരിചരണത്തിന് മുൻഗണന നൽകുന്ന ദമ്പതികളുടെ ഈ കഥ വലിയ അത്ഭുതത്തോടെയാണ് സോഷ്യൽ മീഡിയ ഏറ്റെടുത്തിരിക്കുന്നത്.
