തിരുവനന്തപുരം: സോഷ്യൽ മീഡിയ ഏറ്റെടുത്ത ‘പൂക്കി’ വീഡിയോയിൽ ഒടുവിൽ പ്രതികരണവുമായി മുഖ്യമന്ത്രി വി. ഡി. സതീശൻ. യുഡിഎഫ് സർക്കാരിന്റെ ആദ്യ മന്ത്രിസഭായോഗത്തിന് ശേഷം നടത്തിയ വാർത്താസമ്മേളനത്തിനിടെ അദ്ദേഹം കാണിച്ച ഒരു പ്രത്യേക ഭാവമാണ് (എക്സ്പ്രഷൻ) ഇപ്പോൾ സോഷ്യൽ മീഡിയയിൽ വൻതോതിൽ ആഘോഷിക്കപ്പെടുന്നത്.
വാഹനങ്ങൾ മോഡിഫൈ ചെയ്യുന്നത് സംബന്ധിച്ച് ഉയർന്ന ചോദ്യത്തോടായിരുന്നു മുഖ്യമന്ത്രിയുടെ ഈ രസകരമായ പ്രതികരണം. ഇതോടെ ‘പൂക്കി മുഖ്യമന്ത്രി’ എന്ന പേരിൽ ഈ വിഡിയോ സാമൂഹ്യമാധ്യമങ്ങളിൽ നിമിഷനേരം കൊണ്ട് തരംഗമാവുകയായിരുന്നു. ഇപ്പോഴിതാ ഈ വൈറൽ ചിരിക്ക് പിന്നിലെ യഥാർത്ഥ സന്ദർഭം എന്തെന്ന് വാർത്താസമ്മേളനത്തിൽ മുഖ്യമന്ത്രി തന്നെ നേരിട്ട് വിശദീകരിച്ചിരിക്കുകയാണ്.
വാഹനം മോഡിഫൈ ചെയ്യുന്നത് സംബന്ധിച്ച് ഒരു ചെറുപ്പക്കാരനാണ് തന്നോട് ചോദ്യം ചോദിച്ചതെന്നും അവനോട് തോന്നിയ വാത്സല്യം കൊണ്ടാണ് താൻ അങ്ങനെ മറുപടി നൽകിയതെന്നും മുഖ്യമന്ത്രി പറഞ്ഞു. കഴിഞ്ഞ ദിവസം രാത്രി മകളാണ് തനിക്ക് ഈ വീഡിയോ കാണിച്ചുതന്നതെന്നും അദ്ദേഹം വ്യക്തമാക്കി.
“ഒരു പയ്യനാണ് എന്നോട് ആ ചോദ്യം ചോദിച്ചത്. അവനോട് തോന്നിയ വാത്സല്യം കൊണ്ട് കാണിച്ചതാണ് അത്. ‘പേടിക്കേണ്ടെടാ… ശരിയാക്കാം’ എന്ന മട്ടിലാണ് ഞാൻ അങ്ങനെ പ്രതികരിച്ചത്. ചെറുപ്പക്കാരുടെ ഇടയിലെ വലിയൊരു ആഗ്രഹമല്ലേ അത്. എന്റെ മോളോട് സംസാരിക്കുന്നതുപോലെയാണ് അവനോടും സംസാരിച്ചത്. വാക്കല്ലേ പറഞ്ഞത്, അത് ശരിയാക്കി നൽകും,” വി. ഡി. സതീശൻ വ്യക്തമാക്കി. ഈ വീഡിയോയെ ചുറ്റിപ്പറ്റി നിരവധി രസകരമായ ട്രോളുകളും റീലുകളുമാണ് ഇപ്പോൾ സൈബറിടത്തിൽ വൈറലാകുന്നത്.
