തിരുവനന്തപുരം: കേരളത്തിൽ വൈകാതെ മില്മ പാല് വില കൂടാന് സാധ്യത. പാലിന്റെ വില വര്ധിപ്പിക്കണമെന്ന് സര്ക്കാരിനോട് വീണ്ടും ആവശ്യപ്പെടുമെന്ന് മില്മ ചെയര്മാന് കെ.എസ്.മണി പറഞ്ഞു. നേരത്തെ നല്കിയ കത്തിന് അനുകൂല മറുപടി ലഭിച്ചിട്ടില്ലെന്നും സര്ക്കാരിന്റെ അനുമതിയില്ലാതെ പാല്വില കൂട്ടാനാവില്ലെന്നും അദ്ദേഹം പറഞ്ഞു.
ലീറ്ററിന് 4 മുതല് ആറ് രൂപ വരെ വര്ധിപ്പിക്കണമെന്ന് ആറു മാസം മുന്പ് ബോര്ഡ് തീരുമാനമെടുത്തിരുന്നുവെന്നും അത് ഉടന് നടപ്പാക്കണമെന്നും ആവശ്യപ്പെട്ട് എറണാകുളം മേഖല യൂണിയന് ഭാരവാഹികള് പട്ടം മില്മ ആസ്ഥാനത്ത് പ്രതിഷേധിച്ചു. തീരുമാനം വൈകുന്നത് കര്ഷകരെ ബുദ്ധിമുട്ടിലാക്കുന്നുവെന്ന പരാതിയുമായാണ് മില്മ എറണാകുളം യൂണിയന് ഭാരവാഹികളുടെ പ്രതിഷേധം. പാല് വില വര്ധിപ്പിക്കാന് ആറു മാസം മുന്പ് മില്മ ഡയറക്ടര് ബോര്ഡ് യോഗം തീരുമാനമെടുത്തിരുന്നതായി എറണാകുളം മേഖല യൂണിയന് ചെയര്മാന് സി.എന്.വല്സലന് പിള്ള പറഞ്ഞു.
അതേസമയം, സര്ക്കാരിന്റെ അനുമതിയില്ലാതെ പാല്വില കൂട്ടാനാകില്ലെന്ന കാര്യം എറണാകുളം യൂണിയനും അറിയാമെന്നും മില്മ ചെയര്മാന് കെ.എസ്.മണി പറഞ്ഞു. പാല്വില കൂട്ടാന് മില്മ തീരുമാനിച്ചെങ്കിലും തദ്ദേശ, നിയമസഭാ തിരഞ്ഞെടുപ്പ് കണക്കിലെടുത്താണ് സര്ക്കാര് അനുമതി നിഷേധിച്ചത്. മില്മയുടെ ശുപാര്ശ വീണ്ടും പരിഗണിച്ചാല് പുതിയ സര്ക്കാര് അധികാരത്തില് വന്നാലുടന് പാല്വില വര്ധിക്കും.
