ചെന്നൈ: സിനിമാലോകത്തെ ലേഡി സൂപ്പർസ്റ്റാർ നയൻതാരയുടെ ഒരു ‘അലിഖിത നിയമം’ തെന്നിന്ത്യൻ സിനിമാപ്രേമികൾക്ക് സുപരിചിതമാണ്. തന്റെ ചിത്രങ്ങളുടെ പ്രമോഷൻ പരിപാടികളിൽ നിന്നോ പ്രീ-റിലീസ് ചടങ്ങുകളിൽ നിന്നോ താരം വിട്ടുനിൽക്കാറാണ് പതിവ്. സ്വന്തം സിനിമകളുടെ കരാറിൽ പോലും ഉൾപ്പെടുത്താറുള്ള ഈ നിർബന്ധിത വ്യവസ്ഥയാണ് ഇപ്പോൾ തന്റെ പ്രിയതമന് വേണ്ടി നയൻതാര തിരുത്തിക്കുറിച്ചിരിക്കുന്നത്. വിഘ്നേഷ് ശിവൻ സംവിധാനം ചെയ്ത ‘ലവ് ഇൻഷുറൻസ് കമ്പനി’ (LIC) എന്ന ചിത്രത്തിന്റെ പ്രീ-റിലീസ് വേദിയിലാണ് ആരാധകരെയും വിഘ്നേഷിനെയും ഒരുപോലെ ഞെട്ടിച്ചുകൊണ്ട് നയൻതാര എത്തിയത്.
ഏപ്രിൽ പത്തിന് ചിത്രം തീയേറ്ററുകളിലെത്തുന്നതിന് മുന്നോടിയായി എട്ടാം തീയതി നടന്ന ചടങ്ങിലാണ് നാടകീയമായ ആ നിമിഷങ്ങൾ അരങ്ങേറിയത്. ചിത്രത്തിന്റെ അണിയറപ്രവർത്തകരെ വേദിയിലേക്ക് ക്ഷണിക്കുന്നതിനിടെ നയൻതാരയെക്കുറിച്ച് വിഘ്നേഷ് സംസാരിച്ചിരുന്നു. ‘നടി’ നയൻതാരയെ വേദിയിലേക്ക് വിളിക്കാൻ തനിക്ക് ധൈര്യമില്ലെന്നും അത്തരം പരിപാടികൾക്ക് അവർ വരാറില്ലെന്നും തമാശരൂപേണ അദ്ദേഹം പറഞ്ഞു. തുടർന്ന് ചിത്രത്തിന്റെ നിർമ്മാതാവായും തന്റെ ഭാര്യയായും വേദിയിലേക്ക് വരാൻ വിഘ്നേഷ് ക്ഷണിച്ചെങ്കിലും, അപ്പോഴും അവർ അവിടെയുണ്ടോ എന്ന് അദ്ദേഹത്തിന് ഉറപ്പില്ലായിരുന്നു.
“അവർ പോയിക്കാണുമോ? ചിലപ്പോൾ ഷോ തുടങ്ങിയ ശേഷം അവർ മടങ്ങിയിട്ടുണ്ടാകാം” എന്ന് വിഘ്നേഷ് സംശയത്തോടെ പറഞ്ഞു തീരും മുൻപേ അപ്രതീക്ഷിതമായി നയൻതാര വേദിയിലേക്ക് കയറിവന്നു. സഹായികൾക്കൊപ്പം വേദിയിലെത്തിയ പ്രിയതമയെ കണ്ടതും വിഘ്നേഷ് ഒരു നിമിഷം അമ്പരന്നുപോയി. വികാരഭരിതനായ അദ്ദേഹം നയൻതാരയെ കെട്ടിപ്പിടിച്ചപ്പോൾ കണ്ടുനിന്നവർക്കും അത് ഹൃദ്യമായ അനുഭവമായി മാറി. ഒരു നടിയായല്ല, മറിച്ച് തന്റെ ഭർത്താവിന്റെ സ്വപ്നത്തിനൊപ്പം നിൽക്കുന്ന ഭാര്യയായാണ് താൻ എത്തിയതെന്ന് വ്യക്തമാക്കുന്നതായിരുന്നു നയൻതാരയുടെ ഈ അപ്രതീക്ഷിത സന്ദർശനം. ഇരുവരും വേദിയിൽ പങ്കിട്ട ഈ വൈകാരിക നിമിഷത്തിന്റെ വീഡിയോ ഇപ്പോൾ സോഷ്യൽ മീഡിയയിൽ വൈറലാവുകയാണ്.
