ബെംഗളൂരു: ‘പവർ സ്റ്റാർ’ എന്നറിയപ്പെട്ടിരുന്ന അന്തരിച്ച നടൻ പുനീത് രാജ്കുമാറിന് മരണാനന്തരം സംസ്ഥാനത്തിന്റെ പരമോന്നത സിവിലിയൻ ബഹുമതിയായി കർണാടക രത്ന പുരസ്കാരം നൽകി ആദരിക്കുമെന്നു കർണാടക സർക്കാർ അറിയിച്ചു.
പുനീത് രാജ്കുമാറിന്റെ ജീവിതവും കന്നഡ സിനിമയ്ക്ക് അദ്ദേഹം നൽകിയ സംഭാവനകളും ആഘോഷിക്കാൻ വേണ്ടി ചൊവ്വാഴ്ച ബെംഗളൂരു പാലസ് ഗ്രൗണ്ടിൽ ചലച്ചിത്ര കൂട്ടായ്മ സംഘടിപ്പിച്ച സംഗീത പരിപാടിയായ പുനീത് നമന എന്ന പ്രത്യേക പരിപാടിയിൽ പങ്കെടുക്കുന്ന വേളയിലാണ് മുഖ്യമന്ത്രി ബസവരാജ് ബൊമ്മൈ ഇക്കാര്യം അറിയിച്ചത്.
കൂടാതെ സംസ്ഥാനത്തിന്റെ പരമോന്നത സിവിലിയൻ ബഹുമതി നേടുന്ന പത്താമത്തെ വ്യക്തിയായിരിക്കും അദ്ദേഹം എന്നും കൂട്ടിച്ചേർത്തു.
കവി കുവെംപു, നടനും ഗായകനുമായിരുന്ന രാജ് കുമാർ, മുൻ മുഖ്യമന്ത്രി നിജലിംഗപ്പ, ശാസ്ത്രജ്ഞനായ സി.എൻ റാവു, ആരോഗ്യ വിദഗ്ധൻ ദേവി ഷെട്ടി, തുടങ്ങിയവർക്കും ഈ പുരസ്കാരം ലഭിച്ചിട്ടുണ്ട്.
