ബെംഗളൂരു: കർണാടകയിൽ കെട്ടിക്കിടക്കുന്ന പതിനായിരക്കണക്കിന് പുതിയ ഗാർഹിക എൽ.പി.ജി (LPG) അപേക്ഷകളിൽ എത്രയും വേഗം തീരുമാനമെടുക്കണമെന്നും പുതിയ കണക്ഷനുകൾ അനുവദിക്കുന്നത് വേഗത്തിലാക്കണമെന്നും ആവശ്യപ്പെട്ട് സംസ്ഥാന ഭക്ഷ്യ-പൊതുവിതരണ വകുപ്പ് മന്ത്രി റിസ്‌വാൻ അർഷാദ്. ഇക്കാര്യമുന്നയിച്ച് കേന്ദ്ര പെട്രോളിയം മന്ത്രി ഹർദീപ് സിംഗ് പുരിക്ക് അദ്ദേഹം കത്തയച്ചു. ആഗോളതലത്തിൽ ഉണ്ടായ എൽ.പി.ജി പ്രതിസന്ധിയെ തുടർന്നാണ് പുതിയ കണക്ഷനുകൾ നൽകുന്ന നടപടികൾ മന്ദഗതിയിലായതെന്ന് മന്ത്രി ചൂണ്ടിക്കാട്ടി. നിലവിൽ മുപ്പത്തിയാറായിരത്തോളം അപേക്ഷകളാണ് കർണാടകയിൽ മാത്രം കെട്ടിക്കിടക്കുന്നത്.
ഗാർഹിക സിലിണ്ടറുകളും 5 കിലോഗ്രാം സിലിണ്ടറുകളും തമ്മിലുള്ള വില വ്യത്യാസം സാധാരണക്കാരെയും ഇടത്തരം കുടുംബങ്ങളെയും വൻ സാമ്പത്തിക ഭാരത്തിലേക്ക് തള്ളിയിടുകയാണെന്ന് മന്ത്രി പറഞ്ഞു. 5 കിലോഗ്രാം സിലിണ്ടറുകൾ ചെലവേറിയതായതിനാൽ നിർധന കുടുംബങ്ങൾക്ക് ഇത് താങ്ങാനാവില്ല. അതിനാൽ കർണാടകയുടെ ആവശ്യം മുൻഗണനാടിസ്ഥാനത്തിൽ പരിഗണിക്കണമെന്നും യോഗ്യരായ എല്ലാ കുടുംബങ്ങൾക്കും അടിയന്തരമായി കണക്ഷൻ നൽകാൻ എണ്ണക്കമ്പനികൾക്ക് നിർദ്ദേശം നൽകണമെന്നും അദ്ദേഹം കേന്ദ്രത്തോട് ആവശ്യപ്പെട്ടു.
പുതിയ ഗാർഹിക എൽ.പി.ജി കണക്ഷനുകൾ നിഷേധിക്കുന്നത് വിപണിയിൽ അനധികൃത വിൽപ്പനയ്ക്കും കരിഞ്ചന്തയ്ക്കും വഴിവെക്കുമെന്നും മന്ത്രി മുന്നറിയിപ്പ് നൽകി. ഇതിനിടെ, ഈ ആശങ്ക ശരിവെക്കുന്ന തരത്തിൽ ബെംഗളൂരുവിൽ വൻ തോതിൽ അനധികൃത എൽ.പി.ജി സിലിണ്ടർ ശേഖരം പോലീസ് പിടികൂടി. ബെംഗളൂരു നോർത്തിലെ ടി. ദാസറഹള്ളിയിലെ ഭൈരവേശ്വര എന്റർപ്രൈസസ് ഉടമ പ്രശാന്ത് എന്നയാൾക്കെതിരെ ബാഗലഗുണ്ടെ പോലീസ് എഫ്.ഐ.ആർ രജിസ്റ്റർ ചെയ്തു. ഭക്ഷ്യ ഇൻസ്പെക്ടർ പ്രസന്ന കുമാർ സി നൽകിയ പരാതിയുടെ അടിസ്ഥാനത്തിലായിരുന്നു പരിശോധന.
സർക്കാർ, സ്വകാര്യ എണ്ണക്കമ്പനികളിൽ നിന്നായി ശേഖരിച്ച 528 സിലിണ്ടറുകളാണ് ഇയാളുടെ ഗോഡൗണിൽ നിന്ന് കണ്ടെടുത്തത്. എന്നാൽ ഇവ വാങ്ങിയതുമായി ബന്ധപ്പെട്ട യാതൊരു രേഖയോ ബില്ലുകളോ ഹാജരാക്കാൻ ഉടമയ്ക്ക് കഴിഞ്ഞില്ല. തുടർന്ന് പോലീസ് മുഴുവൻ സിലിണ്ടറുകളും പിടിച്ചെടുക്കുകയായിരുന്നു. പുതിയ കണക്ഷനുകൾ വൈകുന്നത് ഇത്തരം തട്ടിപ്പ് സംഘങ്ങൾക്ക് തഴച്ചുവളരാൻ അവസരമൊരുക്കുന്നു എന്നതിന്റെ തെളിവാണ് ഈ സംഭവമെന്ന് ചൂണ്ടിക്കാണിക്കപ്പെടുന്നു.
