ബെംഗളൂരു : കർണാടകയിലെ രണ്ട് നിയമസഭാ മണ്ഡലങ്ങളിൽ വോട്ടർപട്ടികയിൽ നിന്ന് വ്യാപകമായി പേരുകൾ നീക്കം ചെയ്യാൻ ശ്രമം നടന്നതായി പരാതി. വ്യവസായ മന്ത്രി എം.ബി. പാട്ടീൽ പ്രതിനിധീകരിക്കുന്ന ബബലേശ്വർ, ഗ്രാമവികസന മന്ത്രി ഈശ്വർ ഖണ്ഡ്രെയുടെ മണ്ഡലമായ ഭാൽക്കി എന്നിവിടങ്ങളിലാണ് സർപ്രൈസ് ഇൻസ്‌പെക്ഷൻ റിവിഷൻ (SIR) നടപടികൾക്കിടെ ക്രമക്കേട് പുറത്തുവന്നത്. വോട്ടർപട്ടിക ഭേദഗതിയുമായി ബന്ധപ്പെട്ട് ആക്ഷേപങ്ങളൊന്നുമില്ലെന്ന തിരഞ്ഞെടുപ്പ് കമ്മീഷന്റെ മുൻ അവകാശവാദത്തെ തള്ളുന്നതാണ് പുതിയ വിവരങ്ങൾ.
ബബലേശ്വറിൽ 1,682 പേരുടെയും ഭാൽക്കിയിൽ 2,928 പേരുടെയും പേരുകൾ ഒഴിവാക്കണമെന്ന് ആവശ്യപ്പെട്ടാണ് ഫോം 7 അപേക്ഷകൾ സമർപ്പിക്കപ്പെട്ടത്. നീക്കം ചെയ്യാൻ അപേക്ഷ നൽകിയതിൽ ഭൂരിഭാഗവും ന്യൂനപക്ഷ വിഭാഗത്തിൽപ്പെട്ടവരും ദളിത് സമുദായത്തിലെ മാദർ വിഭാഗക്കാരുമാണ്. എന്നാൽ കളവായ വിവരങ്ങൾ നൽകിയാൽ ശിക്ഷാനടപടികൾ നേരിടേണ്ടിവരുമെന്ന മുന്നറിയിപ്പിനെ തുടർന്ന്, സെപ്റ്റംബർ 23-ഓടെ ഇത്തരം അപേക്ഷകളിൽ ഭൂരിഭാഗവും പിൻവലിക്കപ്പെട്ടു. കുടുംബാംഗങ്ങൾ നേരിട്ട് നൽകിയ അപേക്ഷകളൊഴികെ മറ്റ് കൂട്ട അപേക്ഷകളെല്ലാം പിൻവലിച്ചതായി വിജയപുര ജില്ലാ ഇലക്ടറൽ ഓഫീസറും കളക്ടറുമായ ഡോ. ആനന്ദ് കെ. വ്യക്തമാക്കി.
അതേസമയം, വോട്ടർപട്ടികയിലെ വിവരങ്ങളിലെ വൈരുധ്യം കാരണം നോട്ടീസ് ലഭിച്ചവർക്ക് ആശ്വാസകരമായ പുതിയ നിർദേശവും തിരഞ്ഞെടുപ്പ് കമ്മീഷൻ പുറപ്പെടുവിച്ചിട്ടുണ്ട്. ഇത്തരക്കാരുടെ വീടുകളിൽ ബി.എൽ.ഒമാർ നേരിട്ടെത്തി ആവശ്യമായ രേഖകൾ ശേഖരിച്ച് അപ്‌ലോഡ് ചെയ്യും. ഇവർ നേരിട്ട് ഹിയറിംഗിന് ഹാജരാകേണ്ടതില്ലെന്നും കുടുംബത്തിലെ മുതിർന്ന വ്യക്തിക്ക് ഹിയറിംഗിൽ പങ്കെടുക്കാമെന്നും കമ്മീഷൻ അറിയിച്ചു.
